مەودا میدیا - سەركۆ جەمال

 كۆشكی سپی وادەی سەردانەكەی مستەفا كازمی، سەرۆك وەزیرانی عیراقی بۆ ئەمەریكا ئاشكرا كرد، بەمەبەستی ئەنجامدانی گەڕی دووەمی گفتۆگۆكانی نێوان بەغدا و واشنتۆن.

كۆشكی سپی  ئەمەریكا لە بەیاننامەیەكدا رایگەیاند "مستەفا كازمی، سەرۆك وەزیرانی عیراق لە 20ی ئەم مانگەدا سەردانی وڵاتەكەیان دەكات".
كۆشكی سپی ئەوەشی خستووەتەڕوو "پرسەكانی ئاسایش و وزە و ئابووری و ڤایرۆسی كۆرۆنا لەناو گفتوگۆكانی سەرۆك وەزیرانی عیراق و بەرپرسانی واشنتۆندا تاوتوێ دەكرێن".

جێی ئاماژەیە كازمی لە گەڕی یەكەمیدا كە لە دوو مانگی رابردوودا بەڕێوەچوو، گفتوگۆی لەسەر هەمان ئەو پرسانە و پرسی كشانەوەی هێزەكانی ئەمەریكا لە عیراق كرد".

ئەوەی جێی سەرنجە، بەیاننامەكەی كۆشكی سپی باسی لەوە نەكردووە كە یەكێك لە بڕگەكانی گفتوگۆی سەردانەكەی كازمی پرسی كشانەوەی هێزەكانی ئەمەریكا بێت لە عیراق ،  كە لە بنەڕەتدا گفتوگۆكان بۆ ئەو مەبەستە رێكخراوە.