مەودا میدیا- سەركۆ جەمال

فەرماندەی ئۆپەراسیۆنە هاوبەشەكانی عیراق،‌ رایگەیاند هەماهەنگی  لەگەڵ پێشمەرگە بۆ راوەدوونانی پاشماوەكانی داعش ولەناوبردنیان بەتەواوەتی، بەردەوامە.

لیوا تەحسین خەفاجی، وتەبێژی ئۆپراسیۆنە هاوبەشەكانی عیراق، لە لێدوانێكی رۆژنامەوانیدا رایگەیاند "لەگەڵ فەرماندەكانی هێزی پێشمەرگە چ لەرێگای پەیوەندی تەلەفۆنیەوە یاخود لە رێگای چاوپێكەوتنەكانەوە بێت بەمەبەستی راوەدوونانی تیرۆرستانی داعش هەمانگی بەردەوامە، ئاڵگۆڕی زانیاری لەگەڵ پێشمەرگە بۆ رێگا گرتنە لە كاریگەری داعش لەسەر ئاسایشی هاوڵاتیان و سەلامەتییان".

لیوا تەحسین خەفاجی ئاماژەی بەوەشكردووە "فەرماندەی ئۆپراسیۆنە هاوبەشەكان بەردەوامە لە پلان و هاوكاریەكانی لەگەڵ لایەنە پەیوەندیدارەكان بۆ فشار خستنە سەر گروپە تیرۆرستیەكان، وهەماهەنگی هاوبەشیش بەردەوامە بۆ بنبڕكردنی تیرۆر و رێگاگرتن لە كارەتیرۆرستیەكانی كە زیان بە ئابوری و سەلامەتی وڵات و هاوڵاتیان دەگەیەنێت".