مەودا میدیا-

یەکێتیی نیشتمانیی کوردستان و بزووتنەوەی گۆڕان بە ئامادەبوونی کەسی یەکەمییان، واژۆیان لەسەر رێککەوتنی پێکهێنانی هاوپەیمانیی کوردستانی کرد.

دوێنێ یەکشەممە 20ی حوزەیرانی 2021 یەکێتیی نیشتمانیی کوردستان بە ئامادەبوونی لاهور شێخ جەنگی، بافڵ تاڵەبانی، هاوسەرۆکان و بزووتنەوەی گۆڕان بە ئامادەبوونی عومەر سەید عەلی، رێکخەری گشتیی بزووتنەوەی گۆڕان بە بەشداری ژمارەیەک لە ئەندامانی هەردوولا، کۆبوونەوە و رێککەوتنی پێکهێنانی هاوپەیمانیی کوردستانییان بۆ بەشداریکردن لە هەڵبژاردنی ئەنجومەنی نوێنەرانی عیراق واژۆکرد.

دەقی رێككەوتنی نێوان یەكێتی و گۆڕان: 

 
یاداشتی هاوپەیمانی نێوان یەکێتیی نیشتمانیی کوردستان و بزووتنەوەی گۆڕان

لە هەر شوێنێک کورد یەکڕیز و یەکگرتوو بێت سەرکەوتنی زامن کردووە و رەزامەندی گەلەکەشی بەدەستهێناوە، بۆ ئەو مەبەستە یەکێتیی نیشتمانیی کوردستان و بزووتنەوەی گۆڕان پاش چەندین کۆبوونەوە گەیشتنە ئەم رێککەوتنەی خوارەوە:

 
1- بەمەبەستی بەشداریکردن له هەڵبژاردنی داهاتووی ئەنجومەنی نوێنەرانی عیراق 2021 یەکێتیی نیشتمانیی کوردستان و بزووتنەوەی گۆڕان رێککەوتن لەسەر پێکهێنانی هاوپەیمانێتییەک بەناوی هاوپەیمانیی کوردستان.

2- هەردوولا لە هەموو عیراق کاندیدەکانیان لەژێر ناوی هاوپەیمانیی کوردستان پێشکەش دەکەن.

 ماددەی دووەم: سەرۆکی هاوپەیمانی

 
بەڕێز لاهور شێخ جەنگی، سەرۆکی هاوپەیمانێتییەکە دەبێت و ئەم دەسەڵاتانەی دەبێت:

1- نوێنەرایەتیی هاوپەیمانێتییەکە دەکات لەبەردەم کۆمسیۆنی باڵای سەربەخۆی هەڵبژاردنەکانی عیراق.

2- سەرپەرشتی رێکارەکانی خۆتۆمارکردن و پێشکەشکردنی داواکاری و لیستی کاندیدەکان دەکات بۆ کۆمسیۆنی باڵای سەربەخۆی هەڵبژاردنەکان.

3- سەرپەرشتی کەمپەینی هەڵبژاردن بە هەماهەنگی لەگەڵ بزووتنەوەی گۆڕان.

4- نوێنەرایەتیکردنی هاوپەیمانێتییەکە لە کۆڕ و کۆبوونەوە جەماوەرییەکان، بانگەشەی هەڵبژاردن، هۆکارەکانی راگەیاندن، کۆڕ و سیمینار و مێزگرد و.. هتد دەکات.

ماددەی سێیەم: نوێنەری رێگەپێدراو

نوێنەری رێگەپێدراوی ئەم هاوپەیمانێتییە بەڕێز دەرباز محەمەد دەبێت، هەڵدەستێت بە رێکخستنی پەیوەندی هاوپەیمانێتییەکە لەگەڵ کۆمسیۆنی باڵای سەربەخۆی هەڵبژاردنەکانی عیراق.

ماددەی چوارەم: ئەرک و مافی لایەنە بەشداربووەکان

 
1- ئەم هاوپەیمانێتییە خۆ ویستانەیە و بە رەزامەندی هەردوو لایەن پێکهێنراوە بۆ بەشداریکردن لە هەڵبژاردنی ئەنجومەنی نوێنەرانی عیراق 2021 وە بەردەوام دەبێت تا هەڵبژاردنی داهاتوو.

2- بە رەزامەندی هەردوولا بڕیار دەدرێت لە بەشداریکردنی هەر لایەن و حزبێکی دیکە لەم هاوپەیمانێتییە.

3- هەردوولا سەرپشکن لە پێشکەشکردنی کاندیدی کاریگەر و بەهێز بۆ بازنەکانی هەڵبژاردن.

4- هەردوو لایەنی هاوپەیمانی پابەند دەبن بە جێبەجێکردنی یەک شێوازی بانگەشەی هەڵبژاردن.

5- هاوپەیمانێتییەکە پابەندە بە هەموو رێکار و رێنماییەکانی کۆمسیۆنی باڵای سەربەخۆی هەڵبژاردنەکانی عیراق.

6- لەپاش پەسەندکردنی ئەنجامی کۆتایی هەڵبژاردن، هەردوولا پابەند دەبن لە چوارچێوەی هاوپەیمانی کوردستان پێکەوە دەبن لە هەر بڕیار و بۆچوونێک سەبارەت بە هەر پێشنیار و پێشهاتێک.

ماددەی پێنجەم: ئامانجەکان

 
1- کاردەکەین لە پێناو بەدەستهێنانی مافە دەستوورییەکانی هاوڵاتییانی هەرێمی کوردستان و چارەسەرکردنی پرسی گەڕانەوەی ناوچە دابڕێندراوەکان بۆ هەرێمی کوردستان.

2- هەوڵدان بۆ چارەسەرکردنی سەرجەم کێشە هەڵپەسێردراوەکانی هەرێم و حکومەتی فیدڕاڵ لەسەر بنەمای شەراکەت و تەوافوق و تەوازن.

3- چارەسەری یەکجاری کێشەی مووچەخۆرانی هەرێمی کوردستان بەجۆرێک پێویستە بودجە و پشکی هەرێمی کوردستان لە ململانێ سیاسییەکان جیابکرێتەوە.

4- بەهێزکردنی پەیوەندییە دیپلۆماسییەکان و هەوڵدان بۆ چارەسەرکردنی گرفتەکانی نێوان هەرێم و بەغدا بە ئاراستەی بەهێزکردنی پێگەی هەرێمی کوردستان.

ماددەی شەشەم: بازنەکانی هەڵبژاردن

1- پارێزگای سلێمانی: جگە لە بازنەی (3) هەڵەبجە و سەیدسادق و پێنجوێن کە بزووتنەوەی گۆڕان کاندیدی نابێت، لە بازنەکانی تر (1،2،4،5) هەریەکە و کاندیدێکی دەبێت.

2- کەرکوک: بزووتنەوەی گۆڕان کاندیدی دەبێت.

3- هەولێر: بزووتنەوەی گۆڕان لە بازنەی رۆژهەڵات و بازنەی کۆیە و خەبات کاندیدی دەبێت.

4- یەکێتی لە پارێزگای (سلێمانی، دهۆک، هەولێر، کەرکوک، نەینەوا، سەلاحەدین، دیالە، بەغدا) کاندیدی دەبێت.

ماددەی حەوتەم: کەمپەینی هەڵبژاردن

 
1- هەردوو لایەن بەهەماهەنگی کەمپەین بۆ کاندیدەکان دەکەن.

2- میدیای هەردوولا لە خزمەتی بانگەشەی هەڵبژاردنی کاندیدەکانی هەردوولا دەبێت.

3- کاروباری لۆجستی و رێوشوێنەکانی هەڵبژاردن بۆ هەموو کاندیدەکان وەک یەک دەبێت.

ماددەی هەشتەم: شێوازی هەماهەنگی

 
1- لیژنەیەکی هاوبەش لە هەردوولا بۆ رایکردنی کاروبارەکان پێکدەهێنرێت بەمشێویە:

ا- هەماهەنگکاری پەیوەندییەکان

ب- هەڵبژاردن

ج- راگەیاندن
د- رێکخست و پەیجوری

ه- کارگێڕی و دارایی

٢- ئەم لیژنە هاوبەشە کۆبوونەوەی دەوری و کۆبوونەوەی تایبەت بە هەر کارو بارێک دەکات بە سەرپەرشتی سەرۆکی هاوپەیمانیی کوردستان

پ.ح