مەودا میدیا-

وەزارەتی پێشمەرگەی حکومەتی هەرێمی کوردستان ئاشکرایکرد "تەرمی جوانڕۆ کەریم بە دەست بەستراوی دۆزراوەتەوە، وزارەت لێکۆڵینەوەی زیاتر دەکات و چاوەڕوانی ئەنجامی پشکنینەکانی پۆلیسین".

وەزارەتی پێشمەرگەی حکومەتی هەرێمی کوردستان سەبارەت بە دۆزینەوەی تەرمی هونەرمەند و کارمەندی وەزارەتی پێشمەرگە لە روونکردنەوەیەکدا ئاماژەی بەوەکرد "ئەمڕۆ سێشەممە 22ی حوزەیرانی 2021 هەواڵی گیانلەدەستدانی جوانڕۆ کەریم قادر، کارمەندی وەزارەتمان پێگەیشت، دوای بەدواداچوونی بەرپرسی یەکه سەربازیەکەی لەگەڵ هێزەکانی پۆلیس و ئاسایش، تەرمی ناوبراو بەدەست بەستراوی لە نزیک گوندی پەلکەڕەش کە دەکەوێتە نیوان کەسنەزان و دێگەڵە  دۆزراوەتەوە".

ئاماژە بەوەشکراوە "ناوبراو ئەندامی تیپی جوق و مۆسیقای سەربازی بوو، سەر بە فەرماندەیی ئینزیباتی سەربازی وەزارەتی پێشمەرگە، وەزارەتی پێشمەرگە بەدواداچوون و رێوشوێنی پێویستی لەسەر ئەم تاوانە گرتووەتەبەر و لە ئێستادا لەلایەن پۆلیسەوە دۆسیەی لێکۆڵینەوەی بۆ کراوەتەوەو چاوەڕێی دەرئەنجامی لێکۆڵینەوەکانین".

پ.ح