مەودا میدیا-

بەڕێوەبەرایەتیی ئاو و ئاوەڕۆی هەولێر رایدەگەیەنێت لە سێ رۆژی رابردوودا بەهۆی بەرزبوونەوەی ئاستی شێلووبوونی رووباری زێی گەورە كە سێ وێستگەی ئاوی ئیفراز لەسەر ئەو رووبارەن و لە رێگەی ئەو پرۆژانەی ئاوەوە بە رێژەی 60%ی ئاوی خواردنەوە بۆ شاری هەولێر دابین دەكرێت، بۆیە بە ناچاری وێستگەكان لە كاركردن راگیراون.

لە راگەیەندراوەکەی بەڕێوەبەرایەتیی ئاو و ئاوەڕۆی هەولێر هاتووە "لە سێ ڕۆژی رابردوودا بەهۆی بەرزبوونەوەی ئاستی شێلووبوونی رووباری زێی گەورە كە سێ وێستگەی ئاوی ئیفراز لەسەر ئەو رووبارەن و لە رێگەی ئەو پرۆژانەی ئاوەوە بە رێژەی 60%ی ئاوی خواردنەوە بۆ شاری هەولێر دابین دەكرێت، بۆیە بە ناچاری وێستگەكان لە كاركردن راگیراون، چونكە رادەی شێلواتییەكەی سەرووی توانای كاركردنە بۆ خاوێنكردنەوەی ئەم ڕێژە بەرزەی شێلواتی ئاو".

ئاماژە بەوەشکراوە "هاوڵاتییانی خۆشەویستی شاری هەولێر دڵنیا دەكەینەوە ئێستا بەشێوەیەکی بەردەوام و زانستی چاودێریی رووبارەكە دەکرێت و تێستەکانی دیاریکردنی رادەی شێلواتی رووبارەكە بەردەوامە بۆ ئەوەی بتوانین دووبارە دەست بە بەرهەمهێنانەوەی ئاوی خاوێن بکەینەوە، كە دەمانەوێ بەشێوەیەكی تەندروست ئاوی خاوێن بگەیەنینەوە هاوبەشانی ئاو لە شاری هەولێر".

ئەوەش هاتووە "بە پێویستی دەزانین وردەكاری زیاتر لەسەر ئەو بابەتە بدەین كە وێستگەکانی ئاوی ئیفراز بۆ رێژەی شێلواتی نێوان 1500 تا 2000 دیزاینکراون، بەڵام لە ماوەی ئەم چەند رۆژەی رابردوودا رێژەی شێلواتیەکەی سەرووی 5000ntu بووە و گەیشتووەتە 20000ntu لە هەندێک کاتدا ئەمەش رێژەیەكی زۆرە، ئەم بابەتە بەهۆی بارانبارین بووە لە ناوچە شاخاوییەكانی باکوور و باشووری کوردستان و گرفتی بۆ بەرهەمهێنانی ئاوی خاوێن دروستكردووە".

ئاوی هەولێر ئاماژەی بەوەداوە "ئێمە جارێكی دیكە وێڕای ئەوەی داوا لە هاوڵاتییانی خۆشەویستی شاری هەولێر دەكەینەوە كە دەست بە ئاوەوە بگرن، هاوكات دووپات لەسەر ئەوە دەكەینەوە كە هەموو هەوڵێكی خۆمان خستووەتەگەڕ بۆ ئەوەی لەگەڵ دابەزینی ئاستی شێلواتەكە، یەكسەر دەست بە بەرهەمهێنانەوەی ئاو بكەینەوە، كە پێشبینی دەكەین لە ماوەیەكی كەمدا ئەو گرفتە چارەسەر ببێت".

س.س