مەودا میدیا-

 سەرۆکی حکومەتی هەرێمی کوردستان رایگەیاند، بە داخێکی زۆرەوە، بە ھۆی بارانی بەخوڕ و بەھێزی دوێنێ شەو و بەرەبەیانی ئەمڕۆ، لافاو لە چەند گوند و ناوچەیەکی شاری ھەولێر دروستبوو، لە ئەنجامدا ژمارەیەک ھاوڵاتی گیانیان لەدەستدا و زیانێکی زۆری مادیشی لێ کەوتووەتەوە. 

  

ئەمڕۆ هەینی 17ی کانوونی یەکەمی 2021 مەسرور بارزانی، سەرۆکی حکومەتی هەرێمی کوردستان لە پەیامێکدا رایگەیاند "پرسە و سەرەخۆشی قووڵی خۆم لە بنەماڵە و کەسوکاریان دەکەم و ھاوخەمیانم، خوای مەزن گیانیان بخاتە بەر دلۆڤانی خۆی". 

  

ئاماژەی بەوەشکرد "دەزگا پەیوەندیدارەکانمان راسپاردووە، کە بەپەلە بە ھانای زیانلێکەوتووانەوە بچن و ھەرچی پێویست بێت، بۆ ھاوکاریکردنیان و دانبینکردنی پێداویستییەکانیان ئەنجامی بدەن".  

  

بەپێی ئامارە سەرەتاییەکان، بەهۆی ئەو لافاوەی کە بەرەبەیانی ئەمڕۆ بەهۆی باران بارینی زۆر لە هەولێر و دەوروبەری دروستبوو، هەشت کەس گیانیان لەدەستداوە و زیانێکی زۆری مادیشی لێکەوتووەتەوە. 

ر. ب