مەودا میدیا- سازگار ئەحمەد

وتەبێژی مەرزی نێودەوڵەتی حاجی ئۆمەران رایدەگەیەنێت بەهۆی زۆرینی بارینی بەفرەوە جموجۆڵی بازرگانی و هاتووچۆی هاوڵاتیان لە مەرزی نێودەوڵەتی حاجی ئۆمەران لە وەستاوە و داواش لە بازرگانان و گەشتیاران دەکات ئەمڕۆ سەردانی مەرزەکە نەکەن.

سیروان حسێن، وتەبێژی وتەبێژی مەرزی نێودەوڵەتی حاجی ئۆمەران بە مەودا میدیای راگەیاند "بەهۆی ئەو شەپۆلە بەفر و باران بارینەی رووی لە هەرێمی کوردستان کردووە بەفرێکی زۆر لە ناوچەی حاجی ئۆمەران باریوە و ئەمەش ئاستەنگی هاتووچۆی بۆ بازرگانان و گەشتیاران دروستکردووە".

ئاماژەی بەوەشکرد "لە شەوی رابردووەوە هاتووچۆی بازرگانی و گەشتیاران لە مەرزەکە وەستاو، چونکە نزیکەی مەترێک بەفر باریوە کە تاوەکو ئێستاش بەردەوامە ئەمەش لە دیوی هەرێمی کوردستان و ئێرانیشەوە ئاستەنگی هاتووچۆی دروستکردووە".

سیروان حسێن وتی "تێمەکان بەردەوامن لە پاککردنەوە رێگاکە، بەڵام بەهۆی ئەوەی بارینی بەفر بەردەوامە ناتوانرێت کۆنتڕۆڵ بکرێت، بۆیە هاتووچۆمان راگرتووە و داواش لە بازرگانان و هاوڵاتیان دەکەین ئەمڕۆ سەردانی مەزری حاجی ئۆمەران نەکەن".