مەودا  میدیا- سازگار ئەحمەد

ئەندامێکی لیژنەی کاروباری پێشمەرگە لە پەرلەمانی کوردستان هۆکاری جموجوڵە بەردەوامەکانی چەکدارانی رێکخراوی تیرۆرستیی داعش  لە بەشێک لە سنوورەکانی هەرێمی کوردستان و عیراق دەخاتەڕوو و ئاماژە بەوەش دەکات لە ئێستادا پێکهێنانی هێزی هاوبەش لەلایەن پێشمەرگە و هێزە عیراقییەکانەوە گرنگە.

ئەبوبەکر هەڵەدنی، ئەندامی لیژنەی کاروباری پێشمەرگە لە پەرلەمانی کوردستان سەبارەت بە جموجوڵەکانی چەکدارانی  داعش لە بەشێک لە ناوچەکانی هەرێمی کورستان و عیراق بە مەودا میدیای راگەیاند "سێ هۆکار هەیە بۆ جموجۆڵی بەردەوامی چەکدارانی داعش ئەوانیش، هۆکاری یەکەم ئەوەیە دوای پەرتەوازەبوونی داعش لە ناوچەکانی موسڵ و دەروربەری دووبارە خۆی رێکخستەوە و هۆکاری دووەمیش ئەوەیە بەداخەوە بۆشایی ئەمنی لە دەروربەری کەرکوک و خانەقین هەیە لەدوای کشانەوەی هێزەکانی پێشمەرگە لەوناوچانە، هەروەها هۆکاری سێیەمیش بەکارهێنانی داعشە وەک کارتێکی گوشار لەلایەن چەند هێزێکی ناوچەیی و نێودەوڵەتییەوانێ".

هەڵەدنی ئاماژەی بەوەشکرد "پێکهێنانی هێزی هاوبەش لەلایەن پێشمەرگە و هێزە عیراقییەکانەوە گرنگە، بۆ ئەوەی لەو ناوچانەی جێگەی مەترسین جێگیربکرێن".

هەڵەدنی ئەوەشی خستەڕوو "خاڵێکی دیکەش ئەوەش ئەوەیە هێزەکانی هاوپەیمانان لەو ناوچانە لە رووی ئاسمانییەوە زیاتر چاودێری ناوچەکە بکەن".