مەودا میدیا- رێبین ئەشرەف

نرخی مریشکی زیندوو دابەزیوە بەجۆرێک لەئێستادا کیلۆیەک مریشک لەنێوان هەزار و 900 دینار بۆ دوو هەزار دیناردایە، سەرۆکی کۆمەڵەی کێڵگە پەلەوەرییەکانیش دەڵێت "هۆکارەکەی زۆری مریشک و مانەوەیانە لە هۆڵەکانی بەخێوکردندا".

نازم عەبدوڵڵا، سەرۆکی کۆمەڵەی کێڵگە پەلەوەرییەکانی سلێمانی بە مەودا میدیای راگەیاند "هەفتەی رابردوو کۆبوونەوەیەکمان لەگەڵ حکومەت و لایەنە پەیوەندیدارەکان کردووە سەبارەت بە خراپی دۆخی خاوەن کێڵگەکان و گرانی نرخی عەلەف و پێداویستییەکانی دیکە و بەڵێنیان پێداوین کێشەکانمان بۆ چارسەربکەن هاوکاری زیاتری کێڵگەکان بکەن".

وتیشی "هۆکاری ئەو دابەزینە لە نرخی مریشکدا دەگەڕێتەوە بۆ ئەوەی ئێستا بەشیکی زۆر لە کێڵگەکان پڕن لە مریشک و حکومەت رێستۆرانت، چێشتخانە و وەزارەتەکان ناچارناکات کە مریشکی زیندووی ناوخۆ بکڕن، ئەوەش وایکردووە مریشکی ناوخۆ لە کێڵگەکان بمێننەوە و خاوەنی کێڵگەکانیش لە ترسی زەرەر بە هەرزان دەیفرۆشن، هەرچەندە واش هەر زەرەد دەکەن".

نازم عەبدوڵڵا وتیشی" تاکە بەرهەمی ناوخۆ کە دەتوانێت پێویستی وڵات پڕبکاتەوە و لێشی هەناردەبکرێت مریشکە، بەڵام بەداخەوە حکومەت و وەزارەتی کشتوکاڵ و لایەنە پەیوەندیدارەکان زۆر خەمساردن لە ئاست ئەو بەرهەمە گرنگەدا".

ر. ئ