مەودا میدیا- رێبین ئەشرەف

بەیانی ئەمڕۆ لەسەر رێگەی سیتەک- هەواری شار لە رووداوێکی هاتوچۆدا دوو هاوڵاتی برینداربوون، دۆخی یەکێکیان ناجێگیرە.

کاتژمێر 8:10 خولەکی سەرلەبەیانی ئەمڕۆ دووشەممە لە دوو سایدی خوار تونێلی (پێشڕەو) رووداوێکی هاتوچۆ لە جۆری وەرگەڕان روویدا و بەهۆیەوە دوو هاوڵاتیی برینداربوون، شایەت حاڵێک لە شوێنی رووداوەکە بە مەودا میدیای راگەیاند "هۆکاری رووداوەکە تیژڕەوی بووە".

ئەو شایەتحاڵە وتیشی "ئۆتۆمبێلەکە لە جۆری مازدایە بەهۆی تیژڕەوییەوە کۆنترۆڵی لەدەستداوە و خۆی کێشاوە بە شۆستەی قەراغی شەقامەکەدا و دواتر وەرگەڕاوە".

رووداوەکانی هاتوچۆ لە هەرێمی کوردستان یەکێکە لە سەرەکیترین هۆکارەکانی گیان لەدەستدان و برینداربوون، شارەزایانی بواری هاتوچۆ هۆکاری زۆری رووداوەکان بۆ تیژڕەوی شۆفێران و پابەندنەبوون بە رێنماییەکانی هاتوچۆ دەگێڕنەوە.

ر. ئ