مەودا میدیا- رێبین ئەشرەف

بەڕێوەبەری کەشناسی و بوومەلەرزەزانی سلێمانی رایگەیاند، بەپێی نەخشەکان و پێشبینییەکان، وەرزی پایزی ئەمساڵیش رێژەی بارانبارین وەک ساڵی رابردوو کەم دەبێت، بەڵام پێشبینی دەکرێت لە وەرزی زستاندا رێژەکە زیاد بکات.   

  

ئەمڕۆ سێشەممە ئاسۆ کەمال، بەڕێوەبەری کەشناسی و بوومەلەرزەزانی سلێمانی تایبەت بۆ مەودا میدیا رایگەیاند "بەگوێرەی پێشبینییەکان رێژەی بارانبارین لە وەرزی پایزی ئەمساڵیشدا لە خوار ئاستی تێکڕایی ئاساییەوە دەبێت و وەک دوو وەرزی رابردوو دەبێت".

  

ئاماژەی بەوەشکرد "بەڵام پشتیوان بەخوا ئەگەری هەیە لە مانگی 12 و سەرەتای ساڵی نوێ واتە وەرزی زستان رێژەی بارانبارین زیاد بکات و بگاتە ئاستی ئاسایی".   

وتیشی چەند وەرزێکە لەسەر یەک دیاردەی لانینا لە رۆژهەڵاتی ناوەڕاست زاڵە، کە هۆکاری کەمبارانی و وشکی ساردییە لە ناوچەکەدا.

ر. ئ