مەودا میدیا-

سەرۆکی لیژنەی شارەوانی و گواستنەوە و گەیاندن و گەشتوگوزار لە پەرلەمانی هەرێمی کوردستان رایدەگەیەنێت بە هەدەردانی زەوی بە تەنها لە سنووری سلێمانی نیيە، ئاماژەی بەوەشکرد دابینکردنی زەوی بە بەلاش بۆ قوتابخانە ئەهلییەکان و بۆ نه‌خۆشخانه‌كان بە هەدەردانی زەوییە.

لوقمان وەردی، سەرۆکی لیژنەی شارەوانی و گواستنەوە و گەیاندن و گەشتوگوزار لە پەرلەمانی هەرێمی کوردستان بە دەنگی ئەمەریکای راگەیاندووە "بە هەدەردانی زەوی بە تەنها لە سنووری سلێمانی نیيە، بەڵکو لە هەولێر و دهۆکیش نكۆڵی ناكه‌ین، پێویسته‌ به‌ یه‌ک ئاڕاسته‌ له‌ هه‌موو شوێنه‌كان هه‌وڵبدرێت به‌ئاراسته‌ی ڕاگرتنی ئه‌م پرسه‌".

ئاماژەی بەوەکردووە "دابینکردنی زەوی بەخۆڕایی بۆ قوتابخانە ئەهلییەکان و بۆ نه‌خۆشخانه‌كانیش ئه‌و نه‌خۆشخانه‌ تایبه‌تانه‌ی كه‌ هه‌ن له‌چوارچێوه‌ی پرۆژه‌ی وه‌به‌رهێنان زه‌ویان بۆ ته‌رخانكراوه‌ كه‌چی نه‌خۆش به‌شێوازێک چاره‌سه‌ر ده‌كه‌ن كه‌ له‌توانای هاوڵاتی ئاساییدا نییه‌ ئه‌مه‌ش شێوازێكه‌ له‌ شێوازه‌كانی به‌هه‌ده‌ردانی زه‌وی".

لوقمان وەردی ئەوەشی خستووەتەڕوو " لە ناو دەزگیرکراوەکانی سلێمانی لەسەر دۆسێیەی زەوی خه‌ڵكی جۆراوجۆری تێدایه‌ به‌رپرسی تێدایه،‌ به‌ڵام ئه‌مه‌ جارێ قۆناغی لێكۆڵینه‌وه‌یه‌ ڕه‌نگه‌ له‌ئه‌نجامی قۆناغی لێكۆڵینه‌وه‌ به‌ دوایدا بێت كه‌ هه‌نگاوه‌كانی ئیجرائات كردن له‌گه‌ڵ خه‌ڵكی تر له‌ڕۆژانی داهاتوودا ده‌ربكه‌وێت ئەوە پەیوەندی بەلایەنی پەیوەندیدارەوە هەیە".

س.ر