مەودا میدیا- ژیار ئازاد

بەڕێوەبەرایەتی گشتیی ئاسایشی ئاکرێ رەتیدەکاتەوە بکوژەکەی عەقید سابیر هیچ کەرەستەیەکی ئەوانی بەکارهێنابێت و ئەوەی برای کوژراوەکە باسی کردووە بەتۆمەت ناوی بردووە.

بەڕێوەبەرایەتیی گشتیی ئاسایشی ئاکرێ لە بڵاوکراوەیەکدا رایگەیاندووە "تەواوی کەرەستەکانی وەک ( چەک، ئۆتۆمبێل، کەلوپەلی ئاسایش ) کە تاوانباری سەرەکی کوشتنی عەقید سابیر ئاکرەیی لەکاتی تاوانەکەیدا بەکاریهێناوە پەیوەندی بەئەوانەوە نییە و ئەو دەنگۆیانەی برای عەقید سابیر باسی کردووە دوورن لە راستییەوە".

ئاماژە بەوەشکراوە "تاوانبارەکە لە پێش بڕیاری قەدەغەکردنی چەکی بێمۆڵەت لەلایەن وەزارەتی ناوخۆوە  چەکی کڕیوە و ئەو ئامرازانەی لە کوشتنەکەدا بەکارهاتووە هی خۆی بووە".

ئەمەش لەدوای ئەوەدێت، لەکاتی بەخاکسپاردنی عەقید سابیر ئاکرەیی لە چەند رۆژی رابردوودا برا گەورەکەی رایگەیاند، چەک و کەرەستەکانی ئاسایش لە کوشتنی براکەمدا بەکارهێندراوە.