مەودا میدیا-

دەستەی دەستپاکی عیراق بڕیاری دەستگیرکردنی بۆ چوار بەرپرسی حکومەتەکەی مستەفا کازمی، سەرۆک وەزیرانی پێشووی عێراق دەرکرد.

ئەمڕۆ شەممە 4ی ئاداری 2023 فەرمانگەی لێکۆڵینەوەکان لە دەستەی دەستپاکی عیراق رایگەیاند "بەهۆی دەرکەوتنی بەڵگەی نوێ کە ئاماژە بە تێوەگلانی ژمارەیەک بەرپرسی پێشووی حکومەتی عیراق دەکات لە دزینی پارەکانی سپاردنەکانی باج، دادگای دووی کەرخی تایبەت بە دۆسیەکانی دەستپاکی بڕیاری دەستگیرکردنی بۆ چوار بەرپرسی حکومەتی پێشووی عیراق دەرکرد".

ئەو بەرپرسانە بەپێی مادەی 316ی یاسای سزادانەکان فەرمانی دەستگیرکردنیان و دەستگرتن بەسەر ماڵ و موڵکیان بۆ دەرچووە، ئەوانیش  پێکهاتوون لە، ئەحمەد نەجاتی، سکرتێری تایبەتیی مستەفا کازمی، سەرک وەزیرانی پێشووی عیراق، موشترەق عەباس، راوێژکاری مستەفا کازمی، عەلی عەللاوی، وەزیری پێشووی دارایی عیراق و رائید جۆحی، بەرپرسی نووسینگەی سەرۆک وەزیرانی پێشووی عیراق.

س.ر