مەودا میدیا - 

 

بەڕێوەبەرایەتیی تەندروستیی سلێمانی رایدەگەیەنێت کە حاڵەتەکانی سکچوون و رشانەوە زیادیکردووە و گومانی بڵاوبوونەوەی کۆلێرا دەکرێت، لە ئێستاشدا سەرجەم تیمەکان سەرقاڵی بەدواداچوون و پشکنینن.

 

ئەمڕۆ یەکشەممە 27ی ئابی 2023 بەڕێوەبەرایەتیی تەندروستیی سلێمانی رایگەیاند "هاوڵاتییانی سنووری سلێمانی ئاگاداردەکەینەوە لە زۆربوونێکی بەرچاوی حاڵەتەکانی سکچوون و رشانەوە بۆیە گومانی بڵاوبوونەوەی کۆلێرا دەکەین، سەرجەم تیمەکانی بەڕێوەبەرایەتییەکەمان لەئێستادا سەرقاڵی بەدواداچوون و پشکنینن بۆ حاڵەتە تۆمارکراوەکان".

 

باسی لەوەشکردووە "داوا دەکەین هاوڵاتییان خۆیان دووربخەنەوە لە بەکارهێنانی ئەو ئاوە خواردنەوانەی کە لە سەرچاوەکانیان دڵنیانین و تەنها ئەو ئاوە بەکاربهێنن کە بەڕێوەبەرایەتیی ئاوی سلێمانی دابینی دەکات لەگەڵ ئاوی لەبتڵکراو".

 

روونیشی کردووەتەوە "لەمەودوا هەموو جۆرەکانی سەوزە و ماستاو لە چێشتخانە و خواردنگەکان و شوێنە گشتییەکاندا قەدەغەیە و تەنها رێگە بە ماستاوی لەقتوونراو دەدرێت کە بەکاربهێندرێت".

 

تەندروستی سلێمانی وتوشیەتی "بەڕێوەبەرایەتییەکەمان هەموو ئامادەکارییەکانی تەواوکردووە بۆ هەر ئەگەرێکی زیادبوونی حاڵەتەکانی سکچوون و رشانەوە".

ر.ع