کوردستانی
شارەوانیی سلێمانی سکاڵا لەسەر ئەم کەسانە تۆماردەکات
مەودا میدیا - سلێمانی |
مەودا میدیا -
سەرۆکایەتیی شارەوانیی سلێمانی رایدەگەیەنێت لەمەودوا هەر کەسێک ریکلامی نایاسایی لەسەر شەقامەکان دابنێت و بە ستوونەکانی کارەباوە هەڵیبواسێت، سکاڵای یاساییان لەسەر تۆماردەکرێت.
ئەمڕۆ شەممە 2ی ئەیلولی 2023 سەرۆکایەتیی شارەوانیی سلێمانی رایگەیاند "لە بەردەوامیی هەوڵەکانماندا بە مەبەستی پاراستنی سیمای جوانی شەقامەکان و رێگریکردن لە زیادەڕەویی بۆ سەر موڵکی گشتیی تیمەکانمان هەڵمەتێکی لابردنی ریکلامیان ئەنجامدا".
باسی لەوەشکردووە "بەشی لابردنی سەرپێچی و زیادەڕەوی هەڵمەتەکەیان ئەنجامداوە لە شەقامی 30 مەتریی هەواری تازە و شەقامی 30 مەتریی ئازادی".
روونیشی کردووەتەوە "دەستکراوە بە لێکردنەوە و لابردنی سەرجەم ئەو ریکلامانەی بە شێوازێکی نایاسایی لەسەر شەقامەکان دانراون و بە ستوونی کارەباکانەوە هەڵواسراون".
جەختیشی کردووەتەوە "داوادەکەین هاوڵاتییان ستوونەکانی کارەبا بەکارنەهێنن بۆ ریکلامکردن و بەپێچەوانەشەوە لە ئەگەری پابەند نەبوونیان سکاڵای یاساییان لەسەر تۆمار دەکرێت".
ر.ع
بیروڕا
