مەودا میدیا - رۆژ عەدنان

 

بەڕێوەبەری بەڕێوەبەرایەتیی باخچەکانی سلێمانی رایدەگەیەنێت لە بلوارەکانی بازنەیی مەلیک مەحمود و تاسڵوجە عەرەبانەی گالیسکە، پیانۆ، چەرخە دادەنرێت کە لە تەختە دروستکراون و لەسەر شێوازی کۆن رووپۆشکراون و بە گوڵ رازێندراوەتەوە.

 

ئەمڕۆ شەممە 2ی ئەیلولی 2023 باهۆز سالار، بەڕێوەبەری بەڕێوەبەرایەتیی باخچەکانی سلێمانی بە مەودا میدیای راگەیاند "لە بلوارەکانی بازنەیی مەلیک مەحمود و تاسڵوجە عەرەبانەی گالیسکە، پیانۆ، چەرخە دانراوە کە لە تەختە دروستکراون و لەسەر شێوازی کۆن رووپۆشکراون و بە گوڵ رازێندراوەتەوە و رێژەیەکی زیاتریش دادەنرێت".

 

باسی لەوەشکردووە "بەپێی ئەو بودجەیەی بۆمان دیاریکراوە ماوە ماوە چەند دانەیەک لەم چەرخە و عارەبانە گالیسکانە دروست دەکەین و لە شوێنە جیاوازەکانی شاردا دایدەنێین".

 

ئاماژەی بەوەشکرد "لە دوای 15ی ئەم مانگەوە هەڵمەتی چاندنی نەمام دەستپێدەکەین و ئەو نەمامانەی کە هەمانە و لە کۆگاکاندا دانراوە هەمووی لەسەر شەقامی گشتییەکان و سەرپرد و ژێر پردەکانی سلێمانیدا دەنێژین".

 

روونیشی کردووەتەوە "لەئێستاشدا سەرقاڵی چاککردنی سەرپردی بەردەم نەخۆشخانەی بەخشینین کە ماوەی نزیکەی 10 رۆژە کارکردن تێیدا بەردەوامە و دواتر لە نزیک فامیلی مۆڵ و  بەنزینخانەی بینایی کۆمەڵێک شوێن هەیە کە کاری لێدەکەین بۆ سەوزترکردنی شار".