مەودا میدیا - 

 

سەرۆک وەزیرانی عیراق رایدەگەیەنێت لێپرسینەوە لە سەرجەم ئەو کەسانە دەکرێت کە هۆکاری سەرهەڵدانی ئاڵۆزییەکانی کەرکوک بوون.

 

ئەمڕۆ یەکشەممە 3ی ئەیلولی 2023 نووسینگەی راگیاندنی سەرۆک وەزیرانی عیراق راگەیەندراوێکی بڵاوکردەوە و تێیدا هاتووە "لە کۆبوونەوەی ئەمڕۆی ئەنجومەنی وەزیرانی عیراقدا، محەمەد شیاع سودانی، سەرۆک وەزیرانی عیراق جەختی کردووەتەوە لە پاراستنی ئاسایش و سەقامگیریی شاری کەرکوک".

 

باسی لەوەشکردووە "سەرۆک وەزیران داوای لە لایەنە پەیوەندیدارەکانی شاری کەرکوک کردووە کەمتەرخەمی نەکەن لە سزادانی سەرجەم ئەو کەسانەی بوونەتە هۆی شەهید بوون و برینداربوونی خۆپیشاندەرانی کەرکوک".

 

روونیشی کردووەتەوە "ئەوەی پێویستە بکرێت ئەوەیە کە هاوڵاتییانی کەرکوک بەدووربگیرێن لە دووبەرەکی و رێگریی بکرێت لە هەر هەنگاوێک کە مەبەست لێی تێکدانی ئەمنییەتی شاری کەرکوک و عیراق بێت".

 

جەختیشی کردووەتەوە "دەبێت لێپرسینەوە لە سەرجەم ئەو کەسانە بکرێت کە بوونەتە هۆی سەرهەڵدانی ئاڵۆزییەکانی شاری کەرکوک و بەسزای خۆیان بگەیەندرێن".

ر.ع