مەودا میدیا - رۆژ عەدنان 
 
 ئەندامێکی ئەنجومەنی نوێنەرانی عیراق رایدەگەیەنێت بە هەوڵی فراکسیۆنی یەکێتیی نیشتمانیی کوردستان هەڵکوتانە سەر گەڕەکە کوردەکانی شاری کەرکوک راگیرا دوای کۆبوونەوەمان لەگەڵ سەرۆک ئەرکانی سووپای عیراق و ئۆپەراسیۆنە هاوبەشەکان.

 

ئەمڕۆ یەکشەممە 3ی ئەیلولی 2023 کاروان یاروەیس، ئەندامی ئەنجومەنی نوێنەرانی عیراق بە مەودا میدیای راگەیاند "هەڵکوتانە سەر گەڕەکە کوردەکانی شاری کەرکوک راگیرا بە هەوڵی فراکسیۆنی یەکێتیی نیشتمانیی کوردستان و ئەوەش دوای کۆبوونەوەمان بوو لەگەڵ سەرۆک ئەرکانی سووپای عیراق و ئۆپەراسیۆنە هاوبەشەکان".

 

ئاماژەی بەوەشکرد "داواکاریی ئێمەبوو راگرتنی ئەو هەڵکوتانە سەر گەڕەکە کوردانە بەهۆیەی هاوڵاتییان بێتاقەتن و برینداریش زۆرە لە خۆپیشاندانەکەی کەرکوک  و هەڵکوتانە سەر ماڵەکانیش بۆی هەیە ئەوەنەی تر دۆخەکە تێکبدات".

 

باسی لەوەشکرد "دوای کۆبوونەوەکەش هەموو هێزە ئەمنییەکانی ئەو ناوچانە لابران و دۆخی شاری کەرکوک ئاسایی بووەوە و بەشێکیش لە گیراوەکان هەر لەو کاتەی ئێمە لەوێ بووین ئازادکران".

 

کاروان یاروەیس جەختیشی کردەوە "ئەو کۆمەڵە کەسەی کە تاوەکو ئێستا لە زیندانەکانن و دەستبەسەرکراون، مەکتەبی سیاسیی کەرکوک پارێزەری بۆ گرتوون و بەدواداچوون بۆ کەریسەکانیان دەکەن تاوەکو ئەوانیش ئازادبکرێن".