مەودا میدیا -

 

بەڕێوەبەرایەتیی نەهێشتنی مادە هۆشبەرەکان رایدەگەیەنێت زیاتر لە شەش کیلۆ مادەی هۆشبەر دەستیبەسەردا گیراوە و سێ کەسیش بەتۆمەتی بازرگانیکردن بەو مادەیەوە دەستگیرکراون.

 

ئەمڕۆ پێنجشەممە 7ی ئەیلولی 2023 بەڕێوەبەرایەتیی نەهێشتنی مادە هۆشبەرەکان رایگەیاند "دوای کۆکردنەوەی زانیاریی تەواو و وەرگرتنی فەرمانی دادوەری لێکۆڵینەوەی ئاسایش، ئەمڕۆ لە هەولێر توانرا دەستبگیرێت بەسەر بڕی شەش کیلۆ و 700  گرام مادەی هۆشبەر".

 

باسی لەوەشکردووە "مادە هۆشبەرەکە لە جۆرەکانی کریستاڵ و حەشیش و ماریجوانا و تلیاک بووە و لەگەڵ ئەوەشدا 1000 پارچە ترامادۆڵ و 10 پارچە میتادۆن بوون و سەرجەمیشیان دەستیان بەسەردا گیراوە".

 

روونیشی کردووەتەوە "لەم چالاکییەماندا توانراوە سێ کەس دەستگیربکەین کە دەستیان هەبووە لە بازرگانیکردن بەم مادانەوە و لەئێستادا پەڕاوی لێکۆڵینەوەیان بۆ کراوەتەوە بەپێی یاسای بەرەنگاربوونەوەی مادە هۆشبەرەکان و کارتێکەرە عەقڵییەکان".

ر.ع