مەودا میدیا - رۆژ عەدنان 

 

وتەبێژی وەزارەتی کشتوکاڵ و سەرچاوەکانی ئاو رایدەگەیەنێت ویستی هاوڵاتییان لەسەر خواردنی هێلکە و رێگرییکردن لە بە قاچاغ هێنانی لە وڵاتانی دراوسێوە هۆکاری سەرەکیی گرانبوونی نرخەکەیەتی.

 

ئەمڕۆ پێنجشەممە 7ی ئەیلولی 2023 هیوا عەلی، وتەبێژی وەزارەتی کشتوکاڵ و سەرچاوەکانی ئاو بە مەودا میدیای راگەیاند "راستە نرخی هێلکە گران بووە و نزیکەی 15 هەزار دینار چووەتە سەر نرخەکەی پێشووی، بەشێکی هۆکارەکەشی بۆ رێکارەکانی قەدەغەکردنی هاوردەکردنییەتی بەشێوەی قاچاغ".

 

روونیشی کردووەتەوە "ئەو بەشەی لە هەرێم بەرهەمدێت، بەشی پێداویستییەکانی ناوخۆ دەکات و لە ئێستاشدا ژمارەیەکی زۆر کێڵگەی پەلەوەریمان هەیە کە لە داهاتوودا زیاد دەکات و دەتوانرێت هەناردەی وڵاتانی دیکەیشی بکەین".

 

جەختیشی کردووەتەوە "نرخی یەک کارتۆن هێلکە بۆ نزیکەی 60 هەزار دینار بەرز بووەتەوە و هۆکارێکی کاریگەری دیکەش بۆ هاتنی ئەو ژمارە زۆرەی زیارەتکارە لە ئێرانەو و وڵاتانی دیکەوە بۆ ناوچەکانی ناوەڕاست و باشووری عیراق کە بەمەش خواستێکی زۆر لەسەر هێلکە زیادی کردووە".