مەودا میدیا- سازگار ئەحمەد

 بەڕێوەبەری کەشناسی و بوومەلەرزەزانی سلێمانی رایدەگەیەنێت ئەمڕۆ و سبەینێ کەشوهەوا بەجێگیری دەمێنێتەوە، ئاماژە بەوەشدەکات لە کۆتایی مانگی ئەیلولدا پلەکانی گەرما دادەبەزن.

ئاسۆ کەمال، بەڕێوەبەری کەشناسی و بوومەلەرزەزانی سلێمانی بە مەودا میدیای راگەیاند "ئەمڕۆ و سبەینێ کەشوهەوا بەجێگیری دەمێنێتەوە و پلەکانی گەرماش بەراورد بە رۆژانی پێشووتر نزمبوونەوە بەخۆیەوە دەبینێت".

ئاماژەی بەوەشکرد "لە مانگی ئەیلولدا پلەکانی گەرما بەرزونزمی دەکەن و لە رۆژێک بۆ رۆژێکی دیکە جیاوازە، هەروەها شەپۆلەکانی گەرما کۆتاییان هاتووە و لە رۆژدا پلەکانی گەرما تاڕادەیەک بەرزە، بەڵام لە شەودا پلەکانی گەرما نزمە".

بەڕێوەبەری کەشناسی و بوومەلەرزەزانی سلێمانی وتی "لە کۆتایی مانگی ئەیلولدا پلەکانی گەرما دادەبەزن و کەشوهەوا فێنک دەبێت".

س.ر