مەودا میدیا-

رۆژی شەممە 16ی ئەیلولی 2023 بە سەرپەرشتی بافڵ جەلال تاڵەبانی، سەرۆکی یەکێتیی نیشتمانیی کوردستان مەکتەبی سیاسی کۆبووەوە.

کۆبوونەوەکە کە لە دەباشان بەڕێوەچوو، گفتوگۆی تێروتەسەلی کرد لەسەر دوا پێشهاتەکانی کوردستان و عیراق و ناوچەکە، بە تایبەت پرسی مووچە و گوزەرانی هاوڵاتییانی کوردستان و دوا کۆششەکانی شاندی حکومەتی هەرێمی کوردستان لە سەردانیکردنی بەغدا و دیدارەکانی لەگەڵ حکومەت و لایەنە سیاسییەکانی عیراقدا.

مەکتەبی سیاسی لەسەر ئەم پرسە هەڵوێستەی کرد و تەئکیدیکردەوە ئەولەویەتی ئەم قۆناغە دەبێت بۆ مووچە و ژیانی هاوڵاتییان بێت. بۆ ئەم مەبەستەش گرنگە رۆڵ و هەوڵەکانی یەکێتی لە حکومەتی هەرێم و بەغدا بەو ئاڕاستەیە بێت.

بەشێکی دیکەی کۆبوونەوەکە تایبەت بوو بە تاوتوێکردنی  سەردانی وەفدی یەکێتیی بە سەرۆکایەتیی بافڵ جەلال تاڵەبانی  بۆ کۆماری ئیسلامی ئێران و دیدارەکانی بۆ پێشخستنی پەیوەندی دۆستانەی نێوان هەرێمی کوردستان و عیراق لەگەڵ کۆماری ئیسلامی ئێران، سەرەئەنجام کۆبوونەوە سەردانەکە و پەیوەندییە هەرێمایەتی و نێودەوڵەتییەکانی یەکێتی لەو نێوەندەدا بە ئیجابی و بنیادنەرانە هەڵسەنگاند لە بەرژەوەندی کوردستان و عیراق .

هەر لەمیانی بەڕێوەچوونی کۆبوونەوەی مەکتەبی سیاسیدا لەسەر دوا ئامادەکارییەکانی کۆنگرەی پێنجەمی یەکێتیی نیشتمانیی کوردستان گفتوگۆکراو دووپات لەسەر پسەندکردنی رێوشوێنە پەیڕەوکراوەکان بەرەوە کۆنگرەیەکی سەرکەوتووی یەکێتیانە لە 27ی ئەیلولی 2023 کرایەوە.

س.ر