مەودا میدیا- سازگار ئەحمەد

کارکردن لە پرۆژەی یەکتربڕی باخی بەختیاری شاری سلێمانی بەردەوامی هەیە و سەرپەرشتیاری پرۆژەکەش دەڵێت "ئەگەر کەشوهەوا رێگر نەبێت لە سەرەتای ساڵی داهاتوو پرۆژە تەواودەبێت".

ئەحمەد حسێن، سەرپەرشتیاری پرۆژەی یەکتربڕی باخی بەختیاری لە سلێمانی بە مەودا میدیای راگەیاند " پرۆژەکە لە ئێستادا لە قۆناغی سێیەم دایە کە بریتییە لە تەواوکردنی ژێر ئەندەرپاسەکان و تەواوکردنی شەقامە خزمەتگوزارییەکان کە دەبەسترێتەوە بە شەقامی بەکرەجۆ و قلیاسان، کارەکانی شەقامی بەکرەجۆ تەواوکراوە تەنها کاری بەردی هاڕاو و قیری ماوە".

ئاماژەی بەوەشکرد "پلانمان هەیە بەم نزیکانە شەقامی قلیاسان دابخەین و کارەکانی ئەوێش دەستپێبکرێت، بە گشتی کارەکانی پرۆژەکە بە باشی بەڕێوەدەچن".

لەبارەی تەواوکردنی پرۆژەکەوە ئەحمەد حسێن وتی "لە مانگی شوباتی ساڵی داهاتوو پرۆژەکە تەواودەبێت ئەگەر بەهۆی کەشوهەواوە کارەکانمان دوانەکەوێت".

س.ر