مەودا میدیا-

ئەمڕۆ چوارشەممە ئەنجومەنی وەزیرانی هەرێمی كوردستان كۆبووەوە، بێجگە لە بابەتە گەرمەكانی ئەمدواییە، تەوەری سەرەكیی كۆبوونەوەكە مووچە و شایستە داراییەكانی هەرێمی كوردستان بوو كە بڕیارە بەغدا رەوانەی بكات.

لە كۆبوونەوەكەدا بە سەرۆكایەتیی مەسرور بارزانی، سەرۆكی حكومەتی هەرێم و قوباد تاڵەبانی، جێگری سەرۆكی حكومەت راگەیەندرا "لە پێناو دابینكردنی مووچەی مووچەخۆران لە رێگەی شاندێكی باڵای ئەنجومەنی وەزیران‌ و یەكهەڵوێست‌ و پشتبەست بە دەسەڵات‌ و مافە دەستوورییەكان‌ و بە داتا و زانیاریی وردەوە، روونكردنەوەی پێویست درا بە سەرۆكایەتییەكانی فیدڕاڵیی‌ و هێز ولایەنە سیاسیەكان‌ و بە وردیی پێشنیاری چارەسەری هەنوكەیی‌ و درێژخایەن بۆ دابینكردنی مووچە خرایەڕوو كە جێگەی رەزامەندیی لایەنە عیراقیەكان بوو.

هاوكات لە دوا كۆبوونەوەی ئەنجومەنی وەزیرانی فیدڕاڵ، پێشنیاری هەنووكەیی بە زیادكردنی بڕی پێدانی قەرز پەسەندكرا و ئەنجومەنی وەزیران دەڵێت "بۆ پێشنیاری درێژخایەنیش داوامانكرد، مووچەی موچەخۆرانی هەرێم وەك شایستەیەكی یاسایی مووچەخۆر، جیابكرێتەوە لە هەر ململانێ‌ و جیاوازییەكی بیروڕا، چونكە پێویستە هاوشێوەی مووچەخۆرانی دیكەی عیراق، مووچەی مووچەخۆرانی هەرێمیش خەرجبكرێت وەك مافێكی شایستەی خۆیان كە لە ناو خشتەكانی بودجەی فیدڕاڵ هەم ژمارەی فەرمانبەرانی هەرێم‌ و هەم تەرخانكراوی داراییان بۆ دەستنیشان كراوە و نابێت مووچە وابەستەی هیچ بكرێت.

مەسرور بارزانی لەو بارەیەوە وتی "بەهۆی نەناردنی مووچە و شایستە داراییەكان لەلایەن حكومەتی فیدراڵەوە، موچەخۆران لە بارودۆخێكی سەختدان و سوپاسی فراكسیۆنە كوردستانیەكانیشی كرد لە ئەنجومەنی نوێنەران كە پێشوازی گەرمیان لە شاندەكە كردووە و پشتیوانیی خۆیان بۆ هەوڵ‌ و پێشنیارەكانی هەرێم دەربڕیوە.

ئاماژەی بەوەشكردووە، حكومەتی هەرێمی كوردستان، هەرگیز سازش لە سەر ماف‌ و شایستە دەستورییەكانی خەڵكی كوردستان ناكات‌ و دەستبەرداریان نابێت‌ و لە هەوڵەكانی بەردەوامدەبێت بۆ چارەسەری بنەڕەتیی كێشەكانی پەیوەندیدار بە مووچە و شایستەی مووچەخۆرانی هەرێم، لەو رووەشەوە پڕۆژەی پێویست پێشكەش بە سەرۆك وەزیرانی فیدڕاڵ كراوە كە چارەسەری هاوسەنگانەی لەخۆ گرتووە و لەمبارەیەوە لێكتێگەیشتنی هاوبەشی باش دروستبووە.

هاوكات ئەنجومەنی وەزیران سەرجەم وەزارەتەكانی راسپارد بەردەوامبن لە هاوكاریكردنی دیوانی چاودێریی دارایی‌ و سەرجەم ژمارەی مووچەخۆران‌ و بڕی مووچەكانیان بخرێتە بەردەست كە پێشتریش چەندین جار بە فەرمی خراوەتە بەردەستیان.

لەلایەكی دیكەوە وەزارەتی دارایی‌ و ئابووریشی راسپێردرا لەگەڵ گەیشتنی یەكەم گوژمەی پارەكە كە 700 ملیار دینارە، لەلایەن وەزارەتی دارایی حكومەتی فیدراڵەوە، یەكسەر بێ دواكەوتن دەست بە دابەشكردنی مووچەی مانگی تەمموزی موچەخۆرانی هەرێم بكرێت.

ژ.ع