مەودا میدیا - 

 

وەزارەتی کارەبا رایدەگەیەنێت دوای وەرگرتنەوەی فیدباکی هاوڵاتییان بڕیاری هەرزانکردنی کارەبای ئەو سیتییانە دراوە کە (high cost – تێچووی زۆرن) و لە 156 دینارەوە بووەتە 100 دینار.

 

ئەمڕۆ پێنجشەممە 21ی ئەیلولی 2023 وەزارەتی کارەبای حکومەتی هەرێمی کوردستان رایگەیاند "بەڕەچاوکردنی بارودۆخی هاوڵاتییان و پێشنیازیان لەسەر کەمکردنەوەی نرخی کرێی کارەبای 24 کاتژمێریی سیتییەکان لە دوایین کۆبوونەوەی ئەنجومەنی راوێژکاریی وەزارەتمان کۆمەڵێک پێشنیاز کرا".

 

باسی لەوەشکردووە "پاڵپشتیی دارایی حکومەت بۆ کرێی کارەبای سیتییەکانی 24 کاتژمێریی لە 156 دینارەوە بۆ 100 دینار کەمتر بکرێتەوە".

 

ئەوەشی خستووەتەڕوو "کارەبای کەرتە پیشەسازییەکان وەک کارگەکانی چمەنتۆ و ئاسن لە 120 دینارەوە بۆ 90 دینار کەمبکرێتەوە و کارگەکانی دیکەش بکرێتە 100 دینار".

 

جەختیشی کردووەتەوە "بەستنی سیستەمی پریپەید بۆ سەرجەم هاوبەشانی کارەبا بە نرخی ئێستای کارەبا بێت و بە هیچ شێوەیەک پەیوەندیی بە نرخ و کاتژمێرەکانی پێدانی کارەباوە نەبێت".

ر.ع