مەودا میدیا-

لە بنکەی نشینگەی فرۆکەخانەی سلێمانی، دەیان بەڵگەنامەی ساختە  دەستیان بەسەردا گیرا، بەڕێوەبەرایەتیی نشینگەی سلێمانیش ئامارەكان دەخاتەڕوو.
 
راگەیەندراوی ئەمڕۆ سێشەممە 10ی تشرینی یەكەمی   2023 ی بەڕێوەبەرایەتیی نشینگەی سلێمانی ئاماژە بەوەدەكات، بنکەی نشینگەی فڕۆکەخانەی سەر بە بەڕێوەبەرایەتی نشینگەی سلێمانی، دەیان کەس رادەستی یاسا دەکات، کە بەڵگەنامەیان ساختە کردووە و ویستویانە بەنایاسایی گەشتبکەن.

ئەوەش هاتووە، ئەفسەران و کارمەندانی بنکەی نشینگەی فڕۆکەخانەی نێودەوڵەتی سلێمانی، لە ماوەی دە مانگی رابردوو لە 1ی كانوونی دووەم هەتا 10 تشرینی یەكەمی 2023، توانیویانە رێگری لە گەشتی 37 هاوڵاتیی عێراقی و کەسانی بیانی بکەن، کە ویستویانە بە بەڵگەنامەی ساختەوە گەشتبکەن، یان بێنە ناو خاکی هەرێمی کوردستان.

هێما بۆ ئەوەشكراوە، ئەو تۆمەتبارانە دوای ئاشکراکردنی بەڵگەنامەکانیان رادەستی دادگا کراون و رێکاری پێویستیان لە دژ گیراوەتەبەر.

ژ.ع