مەودا میدیا-
 
وەزیری دەرەوەی ئێران هۆشداری دەدات، ئەگەر هەیە لە چەند كاتژمێری داهاتوودا گرووپە چەكدارییەكانی نزیك لە وڵاتەكەیان هێرش بۆ سەر ئیسرائیل ئەنجامبدەن.

لەمیانی دیدارێكی تەلەڤزیۆنیدا حسێن ئەمیر عەبدوڵاهیان، وەزیری دەرەوەی ئێران رایگەیاند، ئەگەر هەلی چارەسەری سیاسی بۆ دۆزی فەڵەستین لەدەستبدرێت، ئەگەری ئەوە هەیە "بەرەی بەرگری" لە چەندا كاتژمێری داهاتوودا جووڵەی پێبكرێت.

سەبارەت بە ئەگەری دەستێوەردانی ئێران لە كێشمەكێشمەكانی ناوچەكە ئاماژەی بەوەشكرد "هیچ لایەنێك نابێت چاوداخات لە ئاست ئەو تاوانانەی ئیسرائیل ئەنجامیدەدات و هەموو شتێك چاوەڕوانكراوە".

جەختیشیكردەوە، ئەگەر ئەمڕۆ پێش بە هێرشەكانی ئیسرائیل نەگرن و بەرگریی لە غەزە نەكەن، سبەینێ ناچاردەبن لە نەخۆشخانەكانی وڵاتەكەیان رووبەڕووی بۆمبی فسفۆڕیی ببنەوە.

ئەوەش لەكاتێكدایە پێشتر عەبدوڵاهیان لەمیانی سەردانەكەیدا بۆ لوبنان رایگەیاندبوو، هێرشە بەردەوامەكانی ئیسرائیل بێوەڵام نابێت و ئیسرائیلیش یەكەمین لایەنی بەرپرسیار دەبێت لە هەر جووڵەیەك.

پێكدادانەكانی ئیسرائیل و فەڵەستین بەردەوامیی هەیە و بەهۆیەوە هەزاران هاوڵاتیی مەدەمی و سەربازیی و چەكداری لە هەردوو ناوچەكە گیانیان لەدەستداوە.

ژ.ع