مه‌ودا میدیا -

هاوكات له‌گه‌ڵ هه‌وڵه‌كانی حكومه‌تی هه‌رێمی كوردستان له‌باره‌ی مووچه‌ و ناردنی لیژنه‌ی دارایی بۆ به‌غدا، هێشتا بایكۆتی مامۆستایان به‌رده‌وامیی هه‌یه‌ و مه‌سرور بارزانی، سه‌رۆكی حكومه‌تی هه‌رێمی كوردستان به‌و بۆنه‌یه‌وه‌ داوایه‌ك ئاراسته‌ی مامۆستایان ده‌كات.

مه‌سرور بارزانی، سه‌رۆكی حكومه‌تی هه‌رێمی كوردستان، ئه‌مرۆ پێنجشەممە، لە رێوڕەسمی دەرچوونی خوێندكارانی زانکۆی کوردستان-هەولێر ته‌ئكیدی له‌وه‌كرده‌وه‌، 

 مامۆستا هەقی خۆیەتی مووچەکانیان لە سەری مانگدا وه‌ربگرن، بەڵام حکومەتی هەرێمی کوردستان هۆکار نییە بۆ دواخستنی مووچەی مامۆستایان و چینی مامۆستایان تەنیا نین لەوەی کە مووچەکانیان دواکەوتووە. 

وتی: هەموو بەشەکانی تریش، هەموو فەرمانبەرانی تری حکومەت بەداخەوە مووچەکانیان دواکەوتووە، هەموو هەوڵێکمان داوە و بەردەوامیش دەبین کە مافی مامۆستایان و هیچ فەرمانبەرێکی تری هەرێمی کوردستان نەفەوتێت" کاری باشیشمان کردووە و هەنگاوی باشیشمان ناوه‌ لەگەڵ حکومەتی فیدراڵی  تا كێشه‌ی مووچه‌ چارەسەربکرێت.

 

مه‌سرور بارزانی، سه‌رۆكی حكومه‌تی هه‌رێمی كوردستان وتیشی: ئەو مووچانەی دواکەوتوون قەرەبوودەکرێنەوە، بەڵام خوێندن قەرەبوو ناکرێتەوە، بۆیه‌ داوام لە مامۆستایانی خۆشەویست هەیە، کە لە سەرەتای هەفتەی داهاتوو بگەڕێنەوە ناو قوتابخانه‌كان.