مەودا میدیا- سازگار ئەحمەد

نوێنەری ژووری بازرگانی لە عەلوەی سلێمانی رایدەگەیەنێت دوێنێ نرخی کیلۆیەک تەماتە بۆ 1800 دینار بەرزبووەتەوە، ئاماژەی بەوەشکرد قەدەغەکردنی هاوردەکردنی تەماتە بۆ هەرێمی کوردستان بۆ ماوەی مانگێک هەڵگیراوە.

عەتا محەمەد، نوێنەری ژووری بازرگانی لە عەلوەی سلێمانی بە مەودا میدیای راگەیاند "دوێنێ هەینی 20ی تشرینی یەکەمی 2023 نرخی تەماتە لە بازاڕەکاندا بۆ 1800 دینار بەرزبووەوە، بەڵام دوای ئەوەی وەزارەتی کشتوکاڵی هەرێمی کوردستان لەگەڵ وەزارەتی کشتوکاڵی عیراق بڕیاریاندا باج لەسەر تەماتە لاببرێت و رێگە بە هاوردەکردنی بدرێت، ئەمەش نرخی تەماتەی دابەزاند".

ئاماژەی بەوەشکرد "لە دوای بڕیاری دەستپێکردنەوەی هاوردەی تەماتە نرخی تەماتە هاتە 750 دینار، ئەم بڕیارەش بۆ مانگێکە تاوەکو بەرهەمی تەمامەتی ناوەڕاست و خوارووی عیراق پێدەگات".

نوێنەری ژووری بازرگانی لە عەلوەی سلێمانی وتی "پێشئەوەی کەشوهەوا بگۆڕێت و پلەکانی گەرما دابەزێت نرخی کیلۆیەک تەماتە 400 بۆ 500 دینار بوو، بەڵام ساردبوونی کەشوهەوا وایکرد بەرهەمی تەماتە کەمبێتەوە".

س.ر