مەودا میدیا-

به‌رێوه‌به‌رایه‌تیی گشتیی حه‌ج و عومره‌ی هه‌رێمی كوردستان، دوا وادەی پڕكردنەوەی فۆرمی حاجیان لە هەرێم رادەگەیەنێت و دەشڵێت "ئەمساڵ رێكارەكانی حەجكردن لە سعودیە پێشخراوە".

بەپێی راگەیەندراوی به‌رێوه‌به‌رایه‌تیی گشتیی حه‌ج و عومره‌ی هه‌رێمی كوردستان، پرۆسه‌ی پڕكردنه‌وه‌ی فۆرمی حاجیان زۆر به‌ سه‌ركه‌وتوویی به‌رێوه‌چووه‌ و رۆژانه‌  له‌ نزیكه‌وه‌ ئاگاداری هه‌موو بنكه‌كانی تۆماركردنی فۆرمی حاجیانن و به‌رده‌وامیش له‌رێگه‌ی راگه‌یاندن و نووسینگه‌كانه‌وه‌ رێنمایی و به‌رچاوڕوونی بۆ هاوڵاتیان ده‌خه‌نه‌ڕوو.

هاوكات ئاگاداری هاوڵاتییانی هه‌رێمی كوردستان ده‌كاته‌وه‌، رۆژی پێنجشه‌ممه‌ 26ی تشرینیی یەكەمی 2023، كۆتارۆژی پڕكردنه‌وه‌ی فۆرمی حاجیان ده‌بێت و  دوای ئه‌و واده‌یه‌ فۆرمی ناونووسینی حه‌ج به‌رده‌ست نابێت.

لەلایەكی دیكەوە ئاماژە بەوەكراوە، ئه‌مساڵ رێكاره‌كانی حه‌ج كردن له‌ سعودیه‌ پێشخراوه‌ و هه‌موو وڵاتان ئاگه‌داركراونه‌ته‌وه‌ "ده‌بێت به‌ر له‌ ساڵی 2024 رێكاره‌كان ته‌واوبكه‌ن" بۆیه‌ دوای كۆتاییهاتنی پرۆسه‌ی ناونووسین به‌رێوه‌به‌رایه‌تی گشتیی حه‌ج و عومره‌ی هه‌رێمی كوردستان سه‌رقاڵی رێكخستنی ناوه‌كان و ئاماده‌كردنیان بۆ تیروپشك ده‌بێت.

دووپاتیشكراوەتەوە، بەوهۆیەی رێكارەكان پێشخراون داوا له‌ هه‌موو هاوڵاتیان ده‌كه‌ن ئه‌وانه‌ی هەتا ئێستا ناویان تۆمارنه‌كردووه‌، هەتا رۆژی پێنجشه‌ممه‌ سه‌ردانی نووسینگه‌كانی حه‌ج و عومره‌ له‌ پارێزگا و ئیداره‌ سه‌ربه‌خۆییه‌كان بكه‌ن به‌ پێچه‌وانه‌وه‌ دوای ئه‌و واده‌یه‌ فۆرمی ناونووسینی حه‌ج به‌رده‌ست نابێت.

ژ.ع