مەودا میدیا-

سەرۆکی حکومەتی هەرێمی کوردستان رایدەگەیەنێت هەندێک لایەن یاری بە هەستی مامۆستایان دەکەن، ئاماژە بەوەشدەکات ئەوەی قەرەبووناکرێتەوە خوێندنی قوتابیانە.

مەسرور بارزانی، سەرۆکی حکومەتی هەرێمی کوردستان رایگەیاند "بەداخەوە هەندێک لایەن یاری بە هەستی مامۆستایان دەکەن، بۆیە داوا لە هەموو لایەنە سیاسییەکان دەکەم بێن لەگەڵ ئێمە داوای مافی مامۆستایان و هەموو خەڵکی کوردستان بکەن لەو شوێنەی کە مافەکانی پێشێلکردوون".

ئاماژەی بەوەشکرد "بە هەموو شێوەیەک پشتیوانی لە داواکاریی مامۆستایان دەکەین بۆ داواکردنی مووچەکانیان، بەڵام حکومەتی هەرێمی کوردستان هۆکار نییە لە دواکەوتنی مووچەکانیان و هیوادارم مامۆستایان بگەڕێنەوە قوتابخانەکان".

سەرۆکی حکومەتی هەرێمی کوردستان وتی "رێگە نادەین مافی مامۆستایان بفەوتێت و قەرەبوو دەکرێنەوە، بەڵام ئەوەی قەرەبووناکرێتەوە خوێندنی قوتابیانە".

س.ر