مەودا میدیا-

بەڕێوەبەرایەتیی ئاسایشی شارەزوور و بەڕێوەبەرایەتیی ئاسایشی رۆژئاوای سلێمانی لە پارێزگای هەڵەبجە و قەزای بازیان دوو کەسیان بە تۆمەتی فریودان و ئەنجامدانی نوشتە و جادو دەستگیرکرد.

لە راگەیەندراوێکدا ئاسایشی سلێمانی رایگەیاند "هێزەکانی ئاسایش لەدوای ئەنجامدانی چاودێری و بەدواداچوونی وود لەسەر بڕیاری دادوەری لێکۆڵینەوەی ئاسایش، لە پارێزگای هەڵەبجە و قەزای بازیان دوو تۆمەتباریان دەستگیرکرد کە هەوڵیاندابوو لەڕێگەی (سەحر و نوشتە و جادوو) هاوڵاتییان فریوبدەن و ببنە هۆکارێک بۆ تێکدانی خێزان و پەیوەندییە کۆمەڵایەتییەکان".

ئاماژە بەوەکراوە "لەکاتی دەستگیرکردنی تۆمەتباران دەستگیرا بەسەر چەکێکی بێمۆڵەت و چەندین کەرەستە و پارچە جل و بەرگ کە بۆ مەبەستی نوشتەکردن بەکارهێنرابوون، لەئێستادا تۆمەتباران بە مادەی 240 لە یاسای سزادان راگیراون و لێکۆڵینەوە لە دۆسیەکانیان بەردەوامە".

س.ر