مەودا میدیا-

وتەبێژی حکومەتی هەرێمی کوردستان لەبارەی مووچەی فەرمانبەرانی هەرێمی کوردستان پەیامێکی بڵاوکردەوە و دەڵێت "جارێکی دیکە پێچەوانەی هەموو لێدوان و قسەو باسی ناو کۆبوونەوەکان و رێککەوتنەکان ناردنی پارەکەی بەغدا دواکەوت".

پێشەوا هەورامانی، ‎وتەبێژی حکومەتی هەرێمی کوردستان پەیامێکی بڵاوکردەوە و رایگەیاند "بڕیار وابوو هەفتەی پێشوو بڕی 700 ملیار دیناری مووچەی فەرمانبەرانی هەرێمی کوردستان بنێردرێت و دەست بە دابەشکردنی مووچە بکەین، بەڵام جارێکی دیکە پێچەوانەی هەموو لێدوان و قسەو باسی ناو کۆبوونەوەکان و رێککەوتنەکان ناردنی پارەکە دواکەوت".

‎ئاماژەی بەوەکرد "ئەم هەفتەیە شاندی هەرێم دەچنەوە بەغداو رۆژی سێشەممە حکومەتی فیدراڵ کۆبوونەوەی هەیە، دەمانەوێت کە بڕیارێکی کۆتایی و ریشەیی لەم بارەیەوە بدرێت و فەرمانبەرانی هەرێمی کوردستان نەخرێنەوە ناڕەحەتی و سەختی".

‎وتەبێژی حکومەتی هەرێم دەڵێت "لە ماوەی رابردوو نیەتی روونی حکومەتی هەرێم نیشاندرا بۆ رێککەوتن و گەیشتنە ئەنجام لەگەڵ حکومەتی فیدراڵ، هیچ شتێک لەسەر ئێمە نەماوە کە ئەنجامیبدەین، بەڵام ئەگەر دۆخەکە بەمجۆرە بەردەوامبێت، لە بەرانبەر پێشێلکردنی مافی دەستووری خەڵکی هەرێمی کوردستان ناتوانین بێ دەنگ بین".

س.ر