مه‌ودا میدیا - 

هاوكات له‌گه‌ڵ به‌رده‌وامیی خۆپیشاندانی فه‌رمانبه‌ران و بایكۆتی مامۆستایان و مشتومڕی نێوان هه‌رێمی كوردستان و به‌غدا تایبه‌ت به‌ مووچه‌، وه‌زاره‌تی دارایی و ئابووری هه‌رێمی كوردستان ئاشكرایكرد، راپۆرتی داهات و خه‌رجیی سێ مانگی رابردووی ره‌وانه‌ی به‌غدا كرد.

به‌گوێره‌ی راگه‌یه‌ندراوی وه‌زاره‌تی دارایی و ئابووری هه‌رێم كوردستان كه‌ له‌سه‌ر په‌یجی خۆی له‌ تۆڕی كۆمه‌ڵایه‌تیی فه‌یسبوك بڵاویكرده‌وه‌، راپۆرتی تەرازووی پێداچوونەوەی سێ مانگی رابردوو رەوانەی بەغدا کردووه‌، كه‌ ئه‌و راپۆرته‌ سه‌رجه‌می داهات و خه‌رجیی سێ مانگی رابردوو له‌خۆده‌گرێـت.

وه‌زاره‌تی دارایی هه‌رێم روونیكرده‌وه‌، رۆژی یەک شەممە (٢٠٢٣/١٠/٢٩) بە واژۆی ئاوات شێخ جه‌ناب، وەزیری دارایی و ئابوری هەرێمی کوردستان راپۆرتی تەرازووی پێداچونەوە ( میزان مراجعە )ی مانگەکانی تەمموز و ئاب و ئەیلولی هەرێمی کورستانی رەوانەی وەزارەتی دارایی عێراق کردووه‌، کە سەرجەم داهات و خەرجییەکانی سێ مانگی رابردووی هەرێمی کوردستان، بە داتا و ژمارە تێیدا روون کراوەتەوە.