مەودا میدیا-

ئەمڕۆ چوارشەممە 1ی تشرینی دووەمی 2023 پزیشکانی نیشتەجێی خولاو و پلەبەند لە شاری سلێمانی بایکۆتیان راگەیاند و بەیاننامەیەکی هاوبەشیان بڵاوکردەوە.

پزیشکانی نیشتەجێی خولاو و پلەبەند لە سلێمانی رایانگەیاند "بەهۆی دواکەوتنی شایستە داراییەکان و دیارنەبوونی وادە دابەشکردنی مووچە چیتر ناتوانین بەردەوامی بدەین بە بوونمان لە نەخۆشخانەکان".

ئاماژە بەوەکراوە "بۆ رای گشتی و هەریەک لە بەڕێزان ‎د. سامان بەرزنجی، وەزیری تەندروستی هەرێمی کوردستان ‎د. ڕەهێڵ فەرەیدوون، بریکاری وەزارەتی تەندروستی هەرێمی کوردستان ‎د. سەباح نەسرەدین، بەڕێوەبەری گشتیی تەندروستیی سلێمانی د.ئازاد مستەفا، بەڕێوەبەری گشتیی تەندروستیی هەڵەبجە د.سیروان محەمەد، بەرێوبەری گشتیی تەندروستیی گەرمیان، ‎وەک روونە لای هەمووان، هەرێمی کوردستان لەئێستادا بە دۆخێکی سەخت و ناهەمواری ئابووری تێپەڕدەبێت و دواکەوتنی مووچە گرفتێکی زۆری بۆ هاوڵاتییان بە گشتی و چینی فەرمانبەران بە تایبەتی دروستکردووە، ‎بۆ زیاتر لە سێ مانگ دەچێت کە مووچەی فەرمانبەران دابەشنەکراوە و تا ئێستا روون نییە وادەی دابەشکردنی مووچە کەی دەبێت".

ئەوەشخراوەتەڕوو "ئێمە وەکو پزیشکانی گەنج بەردەوام لە خزمەتی هاوڵاتییان بووین و سەرباری دواکەوتنی شایستە داراییەکانمان و درووست بوونی ئاستەنگ و بارگرانی هەموو کاتێک بێ کەم و کوورتی لە ناو نەخۆشخانەکان لە خزمەتی نەخۆش بووین، بەڵام گرنگە لامان بۆ رای گشتی روون بکەینەوە کە ئێمەی پزیشکانی گەنج بەدەر لە مووچەکانمان سەرچاوەیەکی دیکەی داهاتمان نییە و بۆ بەردەوام بوونمان پێویستمان بە پێدانی شایستە داراییەکانمان هەیە و لە ئەگەری زیاتر دواکەوتنی مووچەکانمان ناتوانین چیتر بەردەوامی بدەین بە بوونمان لە ناو نەخۆشخانەکان".

دەشڵێن "ئەگەرچی ئەم هەڵوێستە لە بەرژەوەندیی هاوڵاتییان و نەخۆشەکانمان نییە، بەڵام ئێمە بە ناچاری و بە هۆی ئەو بارگرانیەی هاتووەتە ئەستۆمان چیتر ناتوانین بەردەوام بین لە خزمەتکردن و لە ئەمڕۆوە بڕیاری بایکۆتکردنی سەرتاسەریمان داوە تاوەکو شایستە داراییەکانمان دابەشدەکرێت بەردەوام دەبین لەسەر هەڵوێستی خۆمان ".

س.ر