مەودا میدیا-

كۆمیسیۆنی باڵای سه‌ربه‌خۆی هه‌ڵبژاردنه‌كانی عیراق رایدەگەیەنیت، له‌ڕێگه‌ی 100 هه‌زار كامێراوه‌ چاودێری هه‌ڵبژاردنی ئه‌نجومه‌نی پارێزگاكانی عیراق ده‌كرێت.

داود سلێمان، به‌ڕێوه‌به‌ری رێككاره‌كان و راهێنان له‌ كۆمیسیۆنی باڵای سەربەخۆی هەڵبژاردنەکانی عیراق رایگەیاند "پرۆسه‌ی دانانی كامێرا رۆژێك پێش ئه‌نجامدانی پرۆسه‌ی هه‌ڵبژاردنه‌كان ئه‌نجام ده‌درێت و هه‌ر وێستگه‌یه‌ك كامێرایه‌ك و هه‌ر ناوه‌ندێكی ده‌نگدانیش دوو كامێرا داده‌نرێت و دوو كارمه‌ندیش سه‌رپه‌رشتی و چاودێری كامێراكان ده‌كه‌ن".

راشیگەیاندووە "كامێراكان به‌ وزه‌ی كاره‌با كارده‌كه‌ن و پاترییه‌كی بارگاوی هه‌یه‌ كه‌ توانای هه‌یه‌ 16 كاتژمێر كاربكات و چاودێری پرۆسه‌ی جیاكردنه‌وه‌ی ده‌نگه‌كانی پێده‌كرێت و راسته‌وخۆ وێنه‌كان بۆ نووسینگه‌ی نیشتمانی ده‌نێرێت و ژمارەی کامێرەکانیش 100 هەزار کامێرایە".

 بڕیاره‌ رۆژی 18ی کانوونی یەکەمی 2023، هەڵبژاردنی ئەنجومەنی پارێزگاکای عیراق (جگە لە پارێزگاکانی هەرێمی کوردستان) بە بەشداریی زیاتر لە 23 ملیۆن دەنگدەر بەڕێوەدەچێت و له‌ئێستادا بانگه‌شه‌ی هه‌ڵبژاردن ده‌ستیپێكردووه‌.

س.ر