مەودا میدیا-

بەرەبەیانی ئەمڕۆ چوار فڕۆكەی بێفڕۆكەوان (درۆن) هێرشیانكردە سەر فڕۆكەخانەی نێودەوڵەتیی هەولێر و هێرشەكانیان سەركەوتوو نەبوو.

سەرچاوەكانی هەواڵ رایانگەیاند، بەرەبەیانی ئەمڕۆ سێشەممە 7ی تشرینی دووەمی 2023، چوار فڕۆكەی بێفڕۆكەوان هێرشیانكردووەتە سەر فڕۆكەخانەی نێودەوڵەتیی هەولێر و لە ئەنجامدا گەشتەكانی فڕۆكەخانەكە بۆ ماوەیەكی كاتی راگیراون.

هێرشی ئەو چوار درۆنە سەركەوتوو نەبووە و سیستمی دژەموشەمیی هێزەكانی ویلایەتە یەكگرتووەكانی ئەمەریكا توانیویەتی سەرجەم درۆنەكان تێكبشكێنێت.

سەبارەت بەو هێرشە هەتا كاتی بڵاوكردنەوەی ئەم هەواڵە هیچ لایەنێكی فەرمیی روونكردنەوەی نەداوە و هەواڵەكان لە زاری چەند سەرچاوەیەكی نافەرمی و نیمچەفەرمی گەیەندراونەتە دەزگاكانی راگەیاندن.

پەیوەست بەو رووداوانە و دۆخی ناوچەكە دوێنێ ئانتۆنی بڵینكن، وەزیری دەرەوەی ویلایەتە یەكگرتووەكانی ئەمەریكا لەمیانی سەردانێكیدا بۆ بەغدا جەختیكردەوە، عیراق دەبێت هاوكاربێت لە رێگرتن لە هێرشەكان بۆ سەر هەژموونی وڵاتەكەی لە ناوچەكەدا.

پاش قووڵبوونەوەی ناكۆكییەكانی فەڵەستین - ئیسرائیل و جەنگی ماوەدرێژی نێوانیان لەماوەی مانگی رابردووەوە هەتا ئێستا، لە وڵاتانی رۆژهەڵاتی ناوەڕاست و بەتایبەت عیراق، هێرشە مووشەكی و ئاسمانییەكان بە درۆن بۆ سەر هەژموونی ویلایەتە یەكگرتووەكان لە ناوچەكە زیادیكردووە.

ژ.ع