مه‌ودا میدیا -

یه‌كێتیی نیشتمانیی كوردستان رایگه‌یاند، هه‌وڵه‌كانی به‌رده‌وامه‌ بۆ رێگرتن له‌ وه‌ی كه‌ هه‌رێمی كوردستان و عیراق ببێته‌ گۆڕه‌پانی یه‌كلاییكردنه‌وه‌ی ململانێی سیاسییه‌كان.

بافڵ جەلال تاڵەبانی، سەرۆکی یەکێتیی نیشتمانیی کوردستان لە بارەگای مەکتەبی سیاسی لە هەولێر پێشوازیی لە وەفدێکی باڵای سەربازیی بەریتانیا كرد، بە سەرۆکایەتیی مارشاڵ سامی سامپسۆن، گەورە راوێژکاری بەرگریی بەریتانیا لە رۆژهەڵاتی ناوەڕاست و باکووری ئەفریقا  و دۆخی گشتیی عیراق و پێشهاتە ئەمنی و هەواڵگرییەکانیان تاوتوێكرد.

بافڵ جەلال تاڵەبانی وتی"هەوڵەکانی یەکێتی لەپێناو سەقامگیریی هەرێم و عیراقدایە تاوەکو نەبێتە گۆڕەپانێک بۆ یەکلاییکردنەوەی ململانێ سیاسییەکان، هەموو هەوڵێکیش دەدەین تاوەکو کێشەکان لەڕێگەی دیالۆگ و لێکتێگەیشتنەوە چارەسەربکرێن و ئاشتی و ئارامیی ناوچەکە پارێزراوبێت.

سه‌رۆكی یه‌كێتیی نیشتمانیی كوردستان ئاماژه‌ی به‌وه‌شكرد كه‌ ناوچەکە بە قۆناغێکی هەستیاردا تێدەپەڕێت و پێویستە هەمووان بە ئەوپەڕی بەرپرسیارێتییەوە مامەڵە لەگەڵ دۆخەکە بکەن.