مەودا میدیا-

كاتژمێر 8:00ی بەیانیی ئەمڕۆ پێنجشەممە 30ی تشرینی دووەمی 2023، پرۆسەی هەڵبژاردنی ئەنجومەنی كارگێڕیی ژوورەكانی بازرگانی لە هەرێمی كوردستان دەستیپێكرد و بڕیارە هەتا كاتژمێر 5:00ی ئێوارە بەردەوامبێت.

هەڵبژاردنی ئەندامانی ئەنجومەنی كارگێڕیی ژووری بازرگانی و پیشەسازی لە پارێزگاكانی هەرێم  دوای زیاتر لە 17 ساڵ بەڕێوەدەچێت لە هەولێر، سلێمانی، دهۆك و هەڵەبجە.

لە هەڵبژاردنی ژوورە بازرگانی و پیشەسازییەکانی هەرێم ئەمجارە 13 کاندیدی نوێ هەڵدەبژێردرێن و پێکهاتەی ئەنجومەنی کارگێڕیی ژوورە بازرگانییەکان پێكدێنن. چوار کەسی دیكەش وەک شوێنگرەوە دەمێننەوە.

ژمارەی کاندیدانی ئەنجومەنی کارگێڕیی ژوورە بازرگانییەکان 86 کەسە و دابەشبوون بەسەر پارێزگاکاندا بەمشێوەیە؛

هەولێر 33 کاندید
سلێمانی 26 کاندید 
هەڵەبجە 10 کاندید
دهۆک 17 کاندید

بەپێی راگەیەندراوی ژوورە بازرگانییەكان، لە سلێمانی خولی دوازدەهەم، لە هەولێر خولی نۆیەم و لە هەڵەبجەش خولی یەكەمی هەڵبژاردنی ئەنجومەنی كارگێڕیی ژوورەكانی بازرگانی و پیشەسازی بەڕێوەدەچێت، كە  دواهەمین هەڵبژاردنی ژوورە بازرگانی و پیشەسازییەکانی هەرێمی کوردستان پێش ئەم هەڵبژاردنە لە 16ی نیسانی 2006 ئەنجامدراوە. 

لەم هەڵبژاردنەدا 29 هەزار و 684 کەس مافی دەنگدانیان هەیە بۆ دیاریكردنی ئەنجومەنی كارگێڕیی ژوورە بازرگانییەكان لە هەرێم و هەتا کاتژمێر 5:00ی ئێوارە سندوقەکان کراوە دەبن.

ژ.ع