مه‌ودا میدیا - 

وه‌زاره‌تی پێشمه‌رگه‌ی هه‌رێمی كوردستان بڵاویكرده‌وه‌، ئه‌مڕۆ پێنجشه‌ممه‌ هێزه‌كانی پێشمه‌رگه‌ و سوپای عیراق ئۆپه‌راسیۆنێكی هاوبه‌شیان له‌ چیای قه‌ره‌چووغ له‌ سنووری مه‌خمور ئه‌نجامدا. 

به‌گوێره‌ی راگه‌یه‌ندراوی وه‌زاره‌تی پێشمه‌رگه‌ی كوردستان كه‌ له‌سه‌ر په‌یجی خۆی له‌ تۆری كۆمه‌ڵایه‌تیی فه‌یسبوك بڵاویكرده‌وه‌، ئه‌مڕۆ دووه‌م رۆژی ئۆپه‌راسیۆنه‌كه‌ بووه‌  و کاتژمێر6 ی بەیانی لە سنوری میحوەری 6ی پیادە، هێزەکانی پێشمەرگە بە هاوبەشی لەگەڵ سوپای عێراق، لە بناری چیای قەرەچووغ به‌رێوه‌چوو.

روونكراوه‌ته‌وه‌، لە ئۆپەراسیۆنەکەدا، لیوای 14ی پیادە، سریەی کۆماندۆی میحوەری 6 و دوو مەفرەزەی K9، بە هاوبەشی لەگەڵ یەکەکانی سوپای عێراق لە ناوچەکەدا بەسداربوون، تیایدا گوندەکانی (قەمران، سێ قوچان، قوچ و لهێبان)یان کێوماڵ کرد و گەڕان و پشکنینیان بۆ ئەنجامدان، ئەمەش بەمەبەستی دڵنیایی زیاتر لە ئاسایش و سەقامگیریی ناوچەکە و پاراستنی هاوڵاتیان لە هەڕەشەکانی تیرۆریستان.

له‌دوای گرژییه‌كانی نێوان هێزه‌كانی پێشمه‌رگه‌ و سوپای عیراق له‌ چیای قه‌ره‌چووغ، ئه‌وه‌ دووه‌م ئۆپه‌راسیۆنی هاوبه‌شی نێوان پێشمه‌رگه‌ و سوپای عیراقه‌.