مەودا میدیا-

دەزگای ئاسایشی هەرێمی کوردستان دەستگیرکردنی چوار تۆمەتباری راگەیاند لە ناحیەی بیارە بە تۆمەتی هەڵکەندنی ناوچەیەکی شوێنەوار.

لە راگەیەندراوێکدا دەزگای هەرێمی کوردستان رایگەیاند "دوای کۆکردنەوەی زانیاری و چاودێریکردنی ورد لە رۆژی 9ی کانونی یەکەمی 2023 هێزەکانی ئاسایش بە فەرمانی دادوەری لێکۆڵینەوەی ئاسایشی شارەزوور لە ناحیەی ( بیارە ) لەکاتی هەڵکەندنی ناوچەیەکی شوێنەواریدا چوار تۆمەتبار دەستگیردەکەن".

ئاماژە بەوەکراوە "لەکاتی دەستگیرکردنی تۆمەتباران، هێزەکانی ئاسایش توانیان دەستبگرن بەسەر 12 پارچە شوێنەوار و یەک ئامێری پشکنینی ناوچەی شوێنەواری و چەکێکی بێ مۆڵەتدا".

ئەوەش هاتووە "لەچوارچێوەی کار و چالاکییەکانی دەزگای ئاسایشی هەرێم بۆ بەرەنگاربوونەوەی هەموو کارێکی نایاسایی، هێزەکانمان بەهاوکاری بەردەوامی هاوڵاتیان بۆ زیاتر بەرقەرارکردنی ئارامی و ڕووبەڕووبونەوەی تۆمەتباران و جێبەجێکردنی یاسا لە هەوڵەکانیان بەردەوامن، لەئێستادا تۆمەتباران بەمادەی (24)ی شوێنەوار راگیراون و لێکۆڵینەوە لە دۆسیەکانیان بەردەوامە".

س،ر