مه‌ودا میدیا-

وه‌رزى گه‌رما ده‌ستپێده‌كاته‌وه‌ و دروستبوونى كێشه‌ له‌ كاره‌با و نه‌بوونى، هاوڵاتییان زیاتر نیگه‌ران ده‌كات، وتەبێژی کارەبای ھەرێمیش ده‌ڵێت "سه‌ربارى ئه‌وه‌ى ئاماده‌كارییان كردووه‌ بۆ دروستبوونى هه‌ر گرفتێك رووبه‌رووى كاره‌با بێته‌وه‌، له‌  سه‌ره‌تاى مانگى داهاتوویش كۆبوونه‌وه‌ ده‌كه‌ن و پلانه‌كانیان بۆ هاوین راده‌گه‌یه‌نن".

له‌گه‌ڵ ده‌ستپێكردنه‌وه‌ى وه‌رزى هاوین و گه‌رماكه‌ى، خواستى هاوڵاتییان له‌ سه‌ر به‌كارهێنانى كاره‌با زیاتر ده‌بێت، به‌ تایبه‌ت بۆ ئامێره‌ فێنككه‌ره‌وه‌كان، له‌كاتى دروستبوونى هه‌ر گرفێكیش له‌ كاره‌با كه‌ ببێته‌ هۆى نه‌مانى، واده‌كات هاوڵاتییان زیاتر بێزارببن و  تواناى به‌رگه‌گرتنیان به‌رانبه‌ر كاتێكى زۆرى نه‌بوونى كاره‌با نه‌بێت.

سه‌باره‌ت به‌ ئاماده‌كارییه‌كان بۆ وه‌رزى هاوین و به‌ زوویی چاككردنه‌وه‌ى ئه‌و گرفتانه‌ى له‌م وه‌رزه‌دا رووبه‌ڕووى كاره‌با ده‌بێته‌وه‌، ئومێد ئەحمەد، وتەبێژی کارەبای ھەرێم بە مەودا میدیای راگەیاند "ئامادەکاریی کراوە و لە ماوەی رابردوویشدا کۆبوونەوەیان لەگەڵ ھەموو تیمەکانى كاره‌با کردووه‌ و ئاگاداری ھەمولایەک کراوەتەوە كه‌ چاکسازی بکەن".

وتیشى "له‌ كاتى روودانى ھەر گرفتێکی تەکنیکی، تیمه‌كانیان خێرا ده‌چنە دەمیەوە و چاكیده‌كه‌نه‌وه‌".

ئاماژه‌ى به‌وه‌شكرد "له‌  سه‌ره‌تاى مانگى داهاتوویش كۆبوونه‌وه‌ ده‌كه‌ن و پلانه‌كانیان بۆ وه‌رزى هاوین راده‌گه‌یه‌نن".

پ ح ع