مه‌ودا میدیا-

دواى ئه‌وه‌ى ئه‌نجومه‌نى وه‌زیران بڕیاریدا به‌ دابه‌شكردنى زه‌وى به‌سه‌ر ئه‌و فه‌رمانبه‌رانه‌ى سوودمه‌ندنه‌بوونه‌، له‌و باره‌یه‌وه‌ زانکۆی سەلاحەدین داوا ده‌كات ئه‌و زه‌وییه‌ى ده‌درێت به‌ مامۆستایان و فه‌رمانبه‌رانیان گونجاو و نزیك له‌ زانكۆكه‌یان بێت.

د. کامەران یونس، سەرۆکی زانکۆی سەلاحەدین له‌ نووسراوێكدا كه‌ ئاڕاسته‌ى  وەزارەتی شارەوانی و گەشتوگوزاری هەرێمی کوردستانى كردووه‌، هاتووه‌ "هیوادارین لەگەڵ لیژنەی هه‌مه‌هانگیكار بۆ دابەشکردنی زەوی، لە شوێنێکی گونجاو زەوی بۆ مامۆستا و فەرمانبەرانی زانکۆکەمان دیاریبکرێت، کە گونجاو بێت لەگەڵ پیشە و شوێنەکەیان".
 
هاوكات، سامان عەبدوڵڵا، بەڕێوەبەری راگەیاندنی ئه‌و زانکۆیه‌ ده‌ڵێت "سەرۆکی زانکۆ له‌ نووسراوه‌كه‌دا داوایکردووە ئه‌و شوێنه‌ی ته‌رخان ده‌كرێت بۆ پێدانى زەوی به‌ مامۆستایان و فەرمانبەرانى زانكۆ نزیک بێت لە زانکۆکەیان و ئه‌و شوێنە تایبەت بکرێت بە مامۆستایان و فەرمانبەران".
 
وتیشى "ئه‌وان هێشتا له‌ چاوەڕوانی وەڵامدان، تاوەکو ئێستا وەڵام نەدراونەتەوە".
 
زانکۆی سەلاحەدین دوو هەزار و 600 مامۆستا و پێنج هەزار فەرمانبەری هەیە. 

پ ح ع