مه‌ودا میدیا-

ئیدارەی خۆسه‌ریی له‌ باکوور و رۆژهەڵاتى سووریا رایگه‌یاند، هێرشەکانى دەوڵەتی تورکیا لە درێژەى سیاسەتەکانی کۆمەڵکوژیی و گەمارۆدانى هەرێمەکانە و بۆ رێگریكردنه‌ له‌ هه‌ڵبژاردن.

سوپای تورکیا له‌چه‌ند رۆژى رابردوو شارەکانی تل حەمیس، تل کۆچەر و عامودای سەر بە کانتۆنی جزیرەی بۆردوومان کردووه‌، لە ئەنجامدا چوار شەڕڤانی هێزەکانی سووریای دیموکرات گیانیان له‌ده‌ستداوه‌ و 11 هاوڵاتیی مەدەنیش برینداربن".

ئیدارەی خۆسه‌رى له‌ باکوور و رۆژهەڵاتى سووریا له‌ راگه‌یه‌ندراوێكدا باسی له‌وه‌كردوه‌ 
 "ئەم هێرشە تاوانێکی دیكه‌ی دەوڵەتی تورکیایه‌ و درێژەدان بە سیاسەتی کۆمەڵکوژی و گەمارۆدانی هەرێمەکانە، ئامانج لەم هێرشانە تێکشکاندنی ئیرادەی گەل و تێکۆشانی دیموکراسییە".

ئاماژه‌ به‌وه‌شكراوه‌ "ئەم هێرشانە لە کاتێکدا ئەنجام دەدرێن کە پێکهاتەکانی هەرێمەکە و گەلەکەمان بە مەبەستی ئەنجامدانی هەڵبژاردنی دیموکرات بۆ پێشکەوتنی زیاتر لە بەڕێوەبردنی کۆمەڵگا ئامادەکاری بۆ هەڵبژاردنی دیموکرات دەکەن".

ع،ه