مه‌ودا میدیا-

له‌ لایه‌ن ئاسایشى سۆرانه‌وه‌ كه‌سێك ده‌ستگیركرا، كه‌ به‌ چه‌ندین ئه‌كاونتى جیاواز و جۆراوجۆرى تۆڕه‌كۆمه‌ڵایه‌تییه‌كانه‌وه‌ ببووه‌ مایه‌ى مه‌ترسی له‌ سه‌ر ژیانى هاوڵاتییان و هه‌ڕه‌شه‌ى بڵاوكردنه‌وه‌ى وێنه‌ و ڤیدیۆ تایبه‌ته‌كانیانى ده‌كرد.

بەڕێوەبەرایەتیی ئاسایشی سۆران، له‌ راگەیەندراوێكدا رایگه‌یاندووه‌ "هێزەكانیان لە قەزای خەلیفان، كەسێكیان بەناوی ( ج. ع. ر ) دەستگیركرد، بەتۆمەتی هەڕەشەكردن و ناو زڕاندن و داواكردنی پارە لە چەندین خەڵك لە رێگەی تۆڕە كۆمەڵایەتییەكان لەبەرانبەر بڵاونەكردنەوە و سڕینەوەی وێنە و ڤیدیۆ تایبەتەكانیان".

راشیگه‌یاندووه‌ "تۆمەتبارە دەستگیركراوەكە،  لە رێگەی (3) ئەكاونتی فەیسبوك و (11) Gmail و (6) تویتەر و (4) سناپ و (3) تیلیگرام و (4) ئینستاگرام و چەندین ئەكاونتی تیكتۆكەوە ئەو كارانەی ئەنجامداوە، لەو تاوانەشدا چەندین كەس لە دەرەوەی وڵات هاوكاری تۆمەتبار بوونە".

له‌ راگه‌یه‌ندراوه‌كه‌دا هاتووه‌ "لە ئێستادا تۆمەتبارەكە بەپێی ماددەی ( 2 ی خراپ بەكارهێنانی ئامێرەكانی پەیوەندیكردن) راگیراوە و پەڕاوی لێكۆڵینەوەی بۆ كراوەتەوە".

ئاسایشی سۆران روونیشیكردووه‌ته‌وه‌ "لەماوەی شەش مانگی رابردووا پێنج كەس لەسەر هەمان بابەت دەستگیركراون".

پ ح ع