مه‌ودا میدیا-

له‌ باره‌ى کوژرانی پێشمەرگەیەکی کۆماندۆ، پۆلیسی راپەڕین راگه‌یه‌ندراوێك بڵاوده‌كاته‌وه‌ و تێیدا چۆنێتى روودانى رووداوه‌كه‌ ئاشكرا ده‌كات و رایده‌گه‌یه‌نێت "پێشمه‌رگه‌كه‌ لەلایەن ھاوپیشەیەکییەوە کە فیشەک لەدەستی دەرچووە کوژراوە".

له‌ راگەیەندراوێکدا پۆلیسی راپەڕین رایگه‌یاندووه‌ "كاتژمێر 10ی شەوی ھەینی، تەرمێک گەیەندراوەتە نەخوشخانەی گشتیی رانیە بە ناوی (زێدان عه‌زیز عه‌بدول ) لەدایکبووی 1998 و پێشمەرگەی کۆماندۆ بووە". 

راشیگه‌یاندووه‌ "ئەو کەسە دانیشتووی قەزای ئاکرێیە و بەپێی زانیارییە پزیشکییەکان ئەو کەسە بەھۆی بەرکەوتنی فیشەک گیانی لەدەستداوە".

روونیشیكردووه‌ته‌وه‌ "بە وتەی ئەو کەسانەی کە تەرمەکەیان ھێناوەتە نەخوشخانە ھاوپیشەیەکی خۆی لەکاتی پاکردنەوەی چەک فیشەکی لەدەست دەرچووە و بەر ھاوڕێکەی کەوتووە و گیانی لەدەستداوە".

له‌ راگه‌یه‌ندراوه‌كه‌ى پۆلیسدا ئه‌وه‌ش هاتووه‌ "بە بڕیاری دادوەر، فەرمانی دەستگیرکردن بەپێی ماددەی 411ی یاسای سزادانی عیراقی بۆ تۆمەتباری رووداوەکە دەرچووە".

پ ح ع