مەودا میدیا -

لە 1ی ئەیلولی ئەمساڵ، مامەڵەی وەرگرتنی ئەندامێتی لە سەندیکای رۆژنامەنووسانی کوردستان رادەگیرێت و سکرتێری لقی سلێمانی رۆژنامەنووسانی کوردستانیش رایدەگەیەنێت "راگرتنەکە کاتییە و بۆ رێکخستنەوەی مامەڵەکانی پێشووترە و رەنگە ئامادەکارییەکیش بێت بۆ بەستنی کۆنگرە".

کاروان ئەنوەر، سکرتێری لقی سلێمانی رۆژنامەنووسانی کوردستان بۆ مەودا میدیا رایگەیاند "ئەمە بڕیارێکی ئیدارییە و ساڵانە دووبارە دەبێتەوە و ھیچ مەبەستێکی تری لە پشتەوە نییە، بڕیارەکەش بۆ رێکخستنەوە و پێداچوونەوەی مامەڵەکانی پێشووترە و ئەوانەی مامەڵەیان ئەنجامداوە بەشکو لەم ماوەیە تەواوی بکەن".

وتیشی "دوای یەکلایی کردنەوەی ئەو دۆسیە و مامەڵانەش دووبارە دەرگای ئەندامێتی بە رووی رۆژنامەنووساندا دەکرێتەوە، ئەم بڕیارە تەنھا بۆ ماوەیەکە".

ئاماژەی بەوەشکرد "ھۆکارێکی تریش ئەوەیە لە ئێستادا سەرجەم رێکخراوەکان و سەندیکاکان لە سەروبەندی کۆنگرە بەستندان و دەشبێت کۆنگرە ببەستن".

سەبارەت بەوەی تاوەکو 1ی ئەیلول، وادەی جێبەجێکردنی بڕیارەکە ئەندامی نوێ وەردەگرن، کاروان ئەنوەر، روونیکردەوە "بەڵێ ئەگە رۆژنامەنووسێک ھەموو رێکارەکانی ئەنجامدابێت و ھەموو ئەوانەی پێویستن ئامادەی کردبێت، دەتوانێت مامەڵەی بوون بە ئەندام لەم ماوەیەدا پێشکەش بکات".

پ ح ع