مەودا میدیا- هێلین نوری

بەهۆی خۆ كەرەنتینەكردن و جێبەجێكردنی رێنماییە تەندروستییەكانەوە و نەچوونە شوێنە گشتییەكان و دەرەوەی ماڵەوە، وەرزشكردن و ئەنجامدانی چالاكییە جەستەییەكان لەناو ماڵدا كەمێك ئەستەمترە، بەڵام هەندێك رێنمایی گرنگ هەن كە دەكرێت بەهۆیانەوە گرنگی بە توانا جەستەییەكانت بدەیت و ببێتە كارئاسانی بۆت.

لێكۆڵینەوەكان دەریانخستووە كە وەرزشكردن زۆر گرنگە بۆ بەهێزكردنی بەرگریی جەستە و بەخشینی ئارامی رۆحی، بۆیە گرنگە لەو پێناوەدا ئەم جۆرە چالاكییانە ئەنجام بدرێن:

یەكەم: ئەگەر لە ماڵەوە ئامێرە وەرزشیییەكانت هەیە، ئەوا كارەكەت بۆ ئاسانتر دەبێ و رۆژانە وەرزش بكە.

دووەم: ئەگەر ماڵەكەت پەیژەی تێدایە، ئەوا دەتوانی لەڕێگای چەند جارێكی سەركەوتن و دابەزینەوە پارێزگاری لە لێدانی دڵت بكەیت.

سێیەم: ئەگەر تەنە قورسەكانتان بۆ بەرزكردنەوە لە ماڵەوە نەبوو، ئەوا دەتوانی شتی دیكەی وەكو هەڵگرتن و بەرزركردنەوەی فەردەی برنج، شەكر، ئارد یان هەر شتێكی دیكەی قورس بەكاربهێنیت.

چوارەم: پەت پەتێن یارییەكی زۆر گرنگە، بۆیە گرنگی پێبدە و زوو زوو بیكە.

پێنجەم: هەروەها دەتوانی لەگەڵ ئەندامانی خێزانەكەت سەما یان هەڵپەڕكێ بكەیت، ئەوە هەم وەكو وەرزشكردنە و هەم بۆ بەسەربردنی كاتێكی خۆیشە.

شەشەم: بەكارهێنانی كەناڵی یوتیوب كارێكی بەسوودە و گرنگی پێبدە.

حەوتەم: دەتوانی لەكاتی ئیشكردندا گوێ لە گۆرانی بدەی و لەگەڵیشیدا بجوڵێی و وەرزش بكەی و ئەمەش زیاتر بۆ ژنان سوودی دەبێت.

هەشتەم: هەروەك باشتریشە ئەگەر سەیری ڤیدیۆ وەرزشییەكان بكەیت و سوودیان لێوەربگریت.