مەودا میدیا-

ئەمڕۆ چوارشەممە 2025/2/26، وەزارەتی ئەوقاف و کاروباری ئایینی هەرێمی کوردستان رێنماییە کارگێڕییەکانی تایبەت بە مانگی رەمەزان بڵاوکردەوە.

وەزارەتی ئەوقاف و کاروباری ئایینی هەرێم رایگەیاند "دەبێت وتار و بابەتی ئایینی لەلایەن كەسانی پسپۆڕ لەبواری ئایینی پێشکەش بکرێت".

ئاماژەی بۆ ئەوەشکردووە "پێویستە وتارەكانی دوای عەسر لە مزگەوتەکان لە 20 دەقیقە زیاتر نەبێت".

رێنماییەکانی تایبەت بە مانگی پیرۆزی رەمەزان:

یەكەم: پێویستە چێشتخانەو كافتریار و دوكان و بازاڕەكان ڕەچاوی حورمەتی ئەم مانگە پیرۆزە بگرن و هەستی ڕەۆژوەوان بپارێزن.

دووەم: لەم مانگە پیرۆزەدا هیچ جۆرە خواردن و خواردنەوەیەك لە دام و دەزگا فەرمیەكان پێشكەش ناكرێت 

سێیەم: پێویستە گشت كەناڵەكانی ڕاگەیاندن تایبەتمەندی و پیرۆزی ئەم مانگە لەبەرچاو بگرن شتێك بڵاو نەكەنەوە، كە لەگەڵ گەورەیی و پیرۆزی ئەم مانگەنە گونجێت.

چوارەم: ڕێنمایی تایبەت بەمزگەوت و  مامۆستایانی ئایینی لە وەزارەتی ئەوقاف و كاروباری ئایینی دەرچووە، پێویستە هاوكاری جێبەجێكردن و پراكتیزەكردنی ناوەڕۆكی بدرێت.

پێنجەم: هەر مەراسیمێكی تایبەت بەم مانگە ئەنجام بدرێت لەسەرجە پارێزگا و ئیدارە سەربەخۆكان و قەزا و ناحیەكان پێویست لەژێر چاودێری وەزارەتی ئەوقاف و كاروباری ئایینی/ یان بەڕێوەبەرایەتیە گشتیەكان/ بەڕێوەبەرایەتیەكانی ئەوقاف بێت.

شەشەم:داواكارین لایەنەكانی پەیوەندیدار لەپارێزگاو یەكە ئیداریە سەربەخۆكان سەرپەرشتی و بەدواداچوونی جێ بەجێكردنی ئەم ڕێنماییانە بكەن. 

حەوتەم: سەرجەم كەناڵەكانی ڕاگەیاندن بەرپرسن لە هەر هەواڵێكی نادروست سەبارەت بە راگەیاندنی یەكەم رۆژو كۆتا رۆژی مانگی رەمەزانی پیرۆز.

هەشتەم: لەكانی پێشكەشكردنی بابەتی ئایینی دەبێت كەسێكی پسپۆڕ لەبواری ئایینی و مامۆستایانی ئایینی كە بە فەرمی كار دەكەن میوانداری بكرێن.


ب ح